АҚШ президенти Жо Байден Россия президенти Владимир Путиннинг Беларусда ядро қуролини жойлаштириш нияти ҳақидаги баёнотига изоҳ берди. Байден журналистларга Россиянинг қўшни давлатда ядро қуролини жойлаштириш режаларидан хавотирда эканини айтди, деб ёзмоқда CNN. Шу билан бирга, у Россия ҳали бундай қадамни ташламаганини таъкидлади.
“Улар ҳали буни амалга оширмади, агар мен вертолётда бўлганимда бирор нима юз бермаган бўлса. Албатта, бу мени ташвишга солмоқда. Ўтган бир йил давомида сизлар билан нима ҳақда гаплашдим? Бу хавфли суҳбат, бу хавотир келтириб чиқаради”, — қўшимча қилди АҚШ президент.
Беларусда ядро қуролининг жойлаштирилиши: ҳозиргача нималар маълум?
25 март куни Путин Беларусда тактик ядро қуролларини сақлаш учун махсус омбор қурилаётганини маълум қилди. Бунга жавобан Украина Бирлашган Миллатлар Ташкилоти Хавфсизлик кенгашининг навбатдан ташқари йиғилишини чақиришни талаб қилди. Йиғилиш шу ҳафта бўлиб ўтади.
АҚШ Россия ҳукуматининг эълонидан кейин Америка ядровий кучларининг тайёргарлигини ўзгартириш учун ҳеч қандай сабаб кўрмаётганини қайд этди. Европа Иттифоқи Беларусни бу ишни тўхтатишга чақирди ва акс ҳолда унга қарши санкциялар қўлланишини билдирди. Литва ҳам Россия ва Беларусга қарши санкциялар жорий этиш ниятида.
Польша Путин ва Лукашенконинг қарорини Беларусни Россия ҳарбий машинасига тортиш йўлидаги қадам деб атади, Германия эса Россиянинг баёнотини “ядровий қўрқитишга навбатдаги уриниш” деб атади. Франция Россиянинг қарорини қоралаб, ушбу режани қайта кўриб чиқишга чақирди. Хитой ҳам Россия режасига қарши чиқди.
28 март куни республикачи сенатор Жим Риш Байденни ушбу таҳдидларга жавобан Украинага узоқ масофали ва кассетали ўқ-дорилар етказиб беришга чақирди.
Изоҳ (0)