“Дарахт кесилмасин, дегани мутлақо кесилмасин эмас, зарур бўлса кесилиши мумкин, дегани бўлиши керак”, деб ёзади “Миллий тикланиш” партияси раиси Алишер Қодиров.
Депутат фикрича, жамиятда дарахт кесишдан қўрқув кучайиб бормоқда. Аслида керакcиз дарахтни кесишнинг ёмон жойи йўқ.
“Ишхона олдидаги қурт еб битирган дарахтни олдириб ташлаш учун 1 йил қоғоз қилдик, ҳамма бир-бирига солади! Кесишга келганларни кўриб йиғлашни ҳам кулишни ҳам билмайсан. Дарахт кесиш эмас, одамни дорга осишга келишгандек…
Дарахт кесилмасин, дегани мутлақо кесилмасин эмас, зарур бўлса кесилиши мумкин, дегани бўлиши керак. Албатта, дарахт керак, ҳаво етмаяпти, лекин унутмайлик, дарахтни инсон учун асраймиз, инсонни дарахт учун эмас. Бу кетишда келажак авлод динини унутиб, дарахтга эътиқод қилишни бошлаб юбормаса…
Дарахтни ҳимоясига бирлашгандек сув, ер, энергоресурслар, озиқ-овқат ва вақт, қолаверса ўзлигимизни исрофига қарши ҳам бирлаша олсак эди”, деб фикр билдирган у Telegram каналида.
Аввалроқ тадбиркор Мурод Назаров “Тошкент шаҳрида дарахтларни кесишга чеклов бекор қилиниши керак”лигини айтганди. Унинг фикрича, қурувчи корхоналар қурилиш жараёнига халал бергани учун айрим дарахтларни кесишга мажбур бўлади. Шу сабаб компания зиммасига кесилган дарахтлар ўрнига янгиларини экишни юклаш керак.
“Биз келаси ёки ундан кейинги йилда тахминан қанча қурилиш қилишимизни биламиз. Тахминан нечта дарахт кесилиши мумкинлигини ҳам ҳисоблаймиз. Кесиладиган дарахтлар ўрнига олдиндан янги дарахтларни экиб қўяйлик. Эртага нечта дарахт кесишга тўғри келса, диаметри, кўрсаткичлари белгилаб қўйилсин. Битта катта диаметрга нечта кичкина диаметр тўғри келади аниқ бўлсин. Кейин ҳокимият балансига ўтказиб кетаверади”, деган тадбиркор.
Мурод Назаровнинг мазкур фикрлари жамоатчилик фаоллари томонидан кескин норозиликларга сабаб бўлди. Экопартия вакили ҳам тадбиркор сўзларига қаршилик билдирилди.
Маълумотларга кўра, жорий йил I ярмида дарахтларни кесиш бўйича келиб тушган 3 235 та ариза рад этилгани натижасида 453 238 та дарахт кесилишининг олди олинган. Рад этилган аризаларда кўрсатилган дарахтлар орасида 86 309 таси қимматбаҳо навлар ҳисобланади.
Ўзбекистонда дарахт кесганлик учун жазо чораларини кучайтириш кўзда тутилган қонун 2024 йил 1 мартдан кучга кирган. Қонун асосида Маъмурий жавобгарлик тўғрисидаги кодекснинг 79-моддасига ўзгартириш киритилган. Унга кўра, дарахтлар, буталар, бошқа ўсимликлар ва ниҳоллар қонунга хилоф равишда кесиш, кундаков қилиш, шикастлантириш, йўқ қилиш ёки бошқа жойга кўчириб ўтказганлик учун:
- фуқаролар БҲМнинг 25 бараваридан 50 бараваригача,
- мансабдорлар БҲМнинг 50 бараваридан 75 бараваригача жаримага тортилади.
Аёвсиз кесилаётган дарахтлар
Тошкент вилоятида икки туп кўп йиллик чинорни кесган шахс табиатга 199 миллион сўм зарар етказгани ҳақида хабар берилганди. Хоразмда тўрт туп павловния дарахтини кесган шахс 27 миллион сўмдан ортиқ жаримага тортилган.
Сурхондарёда автомобиль йўлларини реконструкция қилишда қарийб 9,5 минг туп дарахт кўчирилиши мумкинлиги айтилганди.
Шу билан бирга, Тошкент вилоятида тўрт туп ёнғоқ дарахтини кесган шахс табиатга 247 миллион сўм зарар етказган.
Бундан ташқари, Жиззахда тут дарахтлари кесилиши оқибатида ўсимлик дунёсига 738 миллион сўмлик зарар етказилган. Жиззах вилоятида эса 19 туп дарахт кесилиши оқибатида табиатга 435 млн сўмлик зарар етказилгани хабар қилинганди.
Ўзбекистонда ноқонуний дарахт кесишга доир мораторий жорий этилгунга қадар бўлган даврга нисбатан бу каби қонунбузарликлар 60 фоизга камайган. 2025 йилнинг ўтган даврида республика бўйича 848 туп дарахт ноқонуний кесилиб, табиатга жиддий зиён етказилган. Ҳар бир ҳолатда айбдор шахсларга нисбатан қонунга мувофиқ жазо чоралари қўлланилган.
Изоҳ (0)