Мадриднинг “Реал” клуби бразилиялик ҳужумчи Родриго билан унинг келажаги борасида музокараларни бошлади. Бу ҳақда инсайдер Фабрицио Романо хабар берди.
24 ёшли футболчи “қироллик клуби”ни яхши кўради ва жамоада қолишни хоҳлашини маълум қилган. Бироқ унга асосий таркибдан доимий ўрин кафолатланмаган. Шу сабабли Родриго фаолиятини бошқа топ-клубда давом эттириш эҳтимолини ҳам жиддий кўриб чиқмоқда. Боиси қизиқиш билдираётган жамоалар унга асосий таркибдан жой ва етакчилик ролини ваъда қилмоқда.
Ҳозирда бразилиялик футболчига Англиянинг етакчи клублари — “Арсенал”, “Ливерпуль” ва “Манчестер Сити” қизиқиш билдирмоқда. Шунингдек, Саудия Арабистонининг “Ал-Ҳилол” клуби ҳам ҳужумчининг атрофидаги вазиятни жиддий тарзда кузатиб бормоқда.
Родриго яқинда АҚШда ўтган Клублар ўртасидаги Жаҳон чемпионатида ҳам захирада қолиб, кам ўйин амалиётига эга бўлди. Бу ҳолат ҳам футболчининг жамоадан кетиш қарорига таъсир қилмоқда.
“Реал” раҳбарияти футболчини қўйиб юборишга тайёр, бироқ унга 100 миллион евродан юқори нарх белгиланган. Transfermarkt портали эса футболчининг бозор қийматини 90 миллион еврога баҳолаган. Родригонинг амалдаги шартномаси 2028 йилгача мўлжалланган.
Изоҳ (0)