Россия ва Хитойдан келаётган потенсиал таҳдидларнинг кучайиши фонида Пентагон АҚШ Космик кучларини (USSF) коинотда ушбу давлатлар билан келажакда юзага келиши мумкин бўлган можарога тайёрлашни бошлади. Бу ҳақда The Wall Street Journal нашри хабар бермоқда.
Нашр таъкидлашича, АҚШ ҳарбийларининг бундай қадамига, хусусан, Хитой ва Россия коинотда сунъий йўлдошларни ўчириб қўядиган, ҳарбий ва фуқаролик алоқаларини бузадиган ракета ва лазерларни жойлаштираётгани сабаб бўлган.
WSJ маълумотларига кўра, бу ой Оқ уй USSF йиллик бюджетини 30 миллиард долларга оширишни таклиф қилган. Бу 2022 йилдагидан қарийб 4 миллиард доллар кўп, қолаверса АҚШ ҳарбийларининг бошқа қисмлари, жумладан, Ҳарбий-ҳаво кучлари ва денгиз флотига ажратилган суммадан юқори. Шу билан бирга, Космик кучлар ҳарбий хизматчиларини эҳтимолий ҳарбий операцияларга тайёрлаш учун симуляторлар ва бошқа жиҳозларни сотиб олиш биринчи марта USSF харажатларига киритилган.
2023 йил 16 февраль куни Россия Ташқи ишлар вазирлигининг Ядро қуролларини тарқатмаслик ва назорат қилиш департаменти директори ўринбосари Константин Воронцов Украинада ҳарбий мақсадларда фойдаланилаётган космик объектлар “Россиянинг жавоб зарбаси учун қонуний нишонга айланиши мумкин”лигини айтганди.
2021 йил ноябрь ойида Россия ҳарбий синовлар чоғида Совет давридаги сунъий йўлдошни космик қурол билан йўқ қилди. Натижада, ХКС экипажи космик қолдиқлар — сунъий йўлдош қолдиқлари билан тўқнашиш хавфи остида қолди.
2022 йил декабрь ойи бошида Бирлашган Миллатлар Ташкилоти Бош Ассамблеяси Россиянинг “Биринчи бўлиб коинотга қурол жойлаштирмаслик” ҳақидаги резолюциясини қабул қилди. Резолюция Россия ва Хитой томонидан 2008 йилда қуролсизланиш бўйича конференцияда киритилган, фазога қурол жойлаштириш олдини олиш тўғрисидаги шартномани тўлдиришни кўзда тутади. Резолюция учун 122 давлат овоз берган, 50 давлат қарши бўлган ва яна тўрт давлат бетараф қолган.
АҚШ космик кучларининг вазифаси нима?
АҚШ Космик кучлари 2019 йилда ташкил этилган ва мамлакат Қуролли кучлари таркибидаги олтинчи мустақил тузилма бўлиб, унга дастлаб ҳаво кучлари зиммасига юкланган вазифалар юкланган, дея эслатади журналистлар. USSF’нинг асосий вазифалари АҚШнинг коинотдаги манфаатларини режалаштириш ва ҳимоя қилиш, шунингдек, эҳтимолий таҳдидларга эътибор қаратган ҳолда барча бўлинмаларни жиҳозлашдир.
USSF ходимларининг вазифалари ракеталарни учириш, сунъий йўлдошлар, ердаги алоқа ва сенсор ускуналарини бошқаришни ўз ичига олади. Бугунги кунда АҚШ космик кучларининг ҳарбий хизматчилари сони 16 мингга яқин кишини ташкил этади.
АҚШ, Хитой ва Россия — БМТнинг Коинотдан тинч мақсадларда, жумладан илмий фаолият учун фойдаланиш бўйича қўмитаси аъзолари. Ҳар учала давлат ҳам коинотда муҳим ҳарбий ресурсларга эга.
Изоҳ (0)