“Бундай реакция Россия режаларига таъсир ўтказа олмайди”. Кремль Ғарб санкцияларига қарамай, Беларусда ядро қуроли жойлаштирилишини билдирди

Кремлнинг таъкидлашича, Россия янги санкциялар таҳдидига қарамай, Беларусда тактик ядровий қуролларни жойлаштириш режаларидан воз кечмоқчи эмас.

“Бундай реакция, албатта, Россиянинг режаларига ўтказа олмайди. Президент (Путин) шанба куни берган интервьюсида ҳамма нарсани тушунтирди. Бунга қўшимча қиладиган ҳеч нарса йўқ”, — деди Россия президентининг матбуот котиби Дмитрий Песков 27 март куни журналистларга.

25 март куни “Россия 24” телеканали Владимир Путиннинг “Москва. Кремль. Путин” дастури муаллифига берган интервьюсини намойиш этди. Унда Путин Россия Беларусь ҳудудида тактик ядро қуролларини жойлаштиришини айтган. Россия президентининг сўзларига кўра, Беларусь ҳарбий-ҳаво кучларининг 10 та самолёти аллақачон ушбу турдаги қуроллардан фойдаланишга тайёр. Бундан ташқари, Путин Россия Беларусга “Искандар” мажмуасини топширганини айтди, у ҳам тактик ядро қуролини таший олади.

Қўшма Штатлар Владимир Путиннинг баёнотидан кейин Америка ядровий кучларининг тайёргарлигини ўзгартириш учун ҳеч қандай сабаб кўрмаётганини қайд этди. Германия Россия президентининг баёнотини “ядро билан қўрқитишга янги уриниш” деб ҳисобламоқда.

Европа дипломатияси раҳбари Жозеп Боррел, агар Россия Беларусда ядро қуролини жойлаштирса, унга қарши санкциялар билан таҳдид қилди. Украина ушбу масала бўйича БМТ Хавфсизлик кенгашининг навбатдан ташқари йиғилишини чақиришни талаб қилди.