Туркия президентлигига номзодларнинг якуний рўйхати маълум бўлди

Туркияда 27 март куни маҳаллий вақт билан соат 20:00да президентликка номзодлар учун имзо тўплаш жараёни якунланди. Бу ҳақда TRT Haber хабар берди.

Президентликка номзод бўлиш учун камида 100 минг имзо тўплаш керак эди. Бу икки номзод томонидан амалга оширилган. Бундан аввалроқ икки номзод – Ражаб Тоййиб Эрдўғон ва Камол Қиличдарўғли номзод сифатида расман рўйхатга олинган, улар парламент фракциялари томонидан кўрсатилган ва уларга имзо тўплаш керак бўлмаган.

Шу тариқа, Туркия президентлиги учун даъвогарлар рўйхатига тўрт киши кирди:

1. мамлакатнинг амалдаги раҳбари Ражаб Тоййиб Эрдўғон;
2. Олти мухолифатчи партияси алянсидан (Халқ алянси) номзод ва Туркия Халқ партияси раиси Камол Қиличдарўғли;
3. “Ватан” партияси раиси Муҳаррам Инже (114,6 минг имзо тўплаган);
4. “Отатуркчилар иттифоқи”дан номзод Синан Оган (111,5 минг имзо тўплаган).

Туркияда президентлик сайловлари

2022 йил август ойида Туркияда президентлик сайловлари 2023 йил 18 июнда бўлиб ўтиши хабар қилинганди, бироқ 23 январь куни Туркиянинг амалдаги президенти Ражаб Тоййиб Эрдўғон мамлакатда сайловлар 14 майга белгиланганини маълум қилди. 

22 март куни Туркиянинг амалдаги президенти Ражаб Тоййиб Эрдўғон мамлакатда бўлиб ўтадиган президентлик сайловларида ўз номзодини қўйишини расман эълон қилди. Бир неча кундан кейин Камол Қиличдарўғлининг номзоди расман рўйхатга олинди.

Сайловнинг биринчи босқичида ғалаба қозониш учун, давлат раҳбари лавозимига номзод 50 фоиздан ортиқ овоз тўплаши керак. Акс ҳолда, иккинчи босқич бўлиб ўтади, унда биринчисида энг кўп қўллаб-қувватланган икки номзод иштирок этади. Аввалги президентлик сайловлари 2018 йил 24 июнь куни бўлиб ўтганди. Уларда Эрдўғон 52,6 фоиз овоз тўплаган ҳолда ғалаба қозонган. Март ойи бошида Эрдўғон сайловчиларга мухолифат номзодининг ғалабаси Туркия учун фалокат бўлишини айтган.