Қуёшда улкан “тешик” пайдо бўлди: шу ҳафта Ерга кучли тўлқин урилади

Қуёш юзасида улкан “тешик” пайдо бўлди, у 31 март куни Ер томонга қуёшли шамоллар тўлқинини ҳайдаши мумкин. Бу ҳақда Science Alert хабар бермоқда.

Хабар қилинишича, бу сўнгги вақтларда аниқланган иккинчи “тешик”. Яқинда Қуёшда Ердан 30 баравар каттароқ тожли “тешик” топилган. Эндиги тешикнинг ўлчами Ердан 18—20 баравар катта, бироқ у чиқарадиган қуёшли шамол бизга зарар келтирмайди.

Тожли “тешиклар” коинотга Қуёшдан қайноқ шамол чиқаради, бу эса сунъий йўлдошларга зарар етказиши ва Ерда қутб ёғдуларини келтириб чиқариши мумкин.

Олимларнинг фикрича, янги “тешик” Қуёш экваторига яқин нуқтада жойлашган. Тожли “тешиклар” жуда кенг тарқалган, лекин улар одатда Қуёш қутбларига яқинроқ жойда кўринади.

Олимларнинг фикрича, тожли “тешиклар” секундига 800 километрдан ортиқ тезликда жуда тез қайноқ шамолларни келтириб чиқариши мумкин.

“Ушбу тожли тешикнинг шакли унчалик ўзига хос эмас. Бироқ унинг жойлашуви қизиқ”, — дейди Лондон Университет коллежи фазо ва иқлим физикаси доценти Даниэль Вершарен. Унинг аниқлик киритишича, қуёшли шамол Ерга тахминан 31 март, жума куни кечқурундан 1 апрель, шанба куни эрталабгача етиб келади.