Хитой Россиянинг Беларусда ядро қуроли жойлаштиришига қарши чиқди

Хитой Ташқи ишлар вазирлиги Россиянинг Беларусда тактик ядро қуроли жойлаштириш қарорига муносабат билдирди. Бу ҳақда Хитой ТИВ матбуот котиби Мао Нинга таяниб, Sohu нашри хабар берди.

Пекин муносабатида ядро уруши ҳеч қачон бошланмаслиги кераклиги, томонлар Украина инқирозини дипломатик йўл билан ҳал қилишга эътибор қаратиши кераклиги қайд этилган.

“2022 йилнинг 5 январида ядровий қуролга эга давлатлар раҳбарлари қўшма баёнот билан ядро урушида ғалаба қозониш ёки унга қарши курашиш мумкин эмаслиги ҳақида баёнот берди, ядро урушида ғалаба қозониш ёки унга қарши курашиш мумкин эмаслиги айтилди, (баёнотда) ядро қуролига эга бўлган давлатлар ўртасидаги урушларнинг олдини олиш ва стратегик хавфларни камайтириш кераклиги таъкидланди”, — дея эслатди Мао Нин.

Унинг таъкидлашича, ҳозирги шароитда барча томонлар “Украина инқирозини тинч йўл билан ҳал қилиш бўйича дипломатик саъй-ҳаракатларга эътибор қаратиши ва вазиятни юмшатишда биргаликда ҳаракат қилиши керак”.

25 март куни Путин Москва ва Минск халқаро мажбуриятларни бузмасдан, Беларусда тактик ядро қуролини жойлаштиришга келишиб олганини айтди. Путиннинг тушунтиришича, Россия ўз ядро қуролини Беларусга бермаяпти, балки АҚШ ўн йил давомида қилган ишни қилмоқда. Россия Беларусда тактик ядро қуроллари сақланадиган омбор қурилишини 1 июлда якунлайди.

АҚШ ва Украина Россия Беларусда тактик ядро қуролини жойлаштирилишига қандай муносабат билдирди?

АҚШ Россия ҳукуматининг эълонидан кейин Америка ядровий кучларининг тайёргарлигини ўзгартириш учун ҳеч қандай сабаб кўрмаётганини қайд этди.

“Биз Россиянинг Беларусда ядро қуроли жойлаштириши ҳақидаги хабарларни кўрдик. Ядровий кучларимизнинг тайёргарлигини ўзгартириш учун ҳеч қандай сабаб ёки Россия ядро қуролидан фойдаланишга тайёрланаётгани аломатларини кўрмадик”, — деди Пентагон.

Украина президенти офиси раҳбари маслаҳатчиси Михаил Подолякнинг айтишича, Европа Беларусда тактик ядро қуролини жойлаштириш қарорига жавобан Россияга қарши санкцияларни кучайтириши керак. Хусусан, у “Росатом”га нисбатан чекловлар жорий этишга чақирди.

Германия ташқи ишлар вазирлиги эса Россиянинг Беларусда ядро қуролини жойлаштириш режалари ҳақидаги баёнотини “ядровий қўрқитишнинг навбатдаги уриниши” деб атади. Шунингдек, ТИВ Путиннинг НАТО мамлакатларида ядро қуролини жойлаштиришга оид мисоли “чалкаштирувчи ва бунга асос бўла олмаслигини” қайд этди.