Франция Ташқи ишлар вазирлиги Россиянинг Беларусь ҳудудида тактик ядровий қуролларини жойлаштириш режаларини қоралади. Вазирлик Россия томонини ушбу “беқарорлаштирувчи келишув”ни қайта кўриб чиқишга чақирди.
“Франция Россияни ядро қуролига эга давлатдан кутиладиган масъулиятни кўрсатишга ва Беларусь билан ядро қуролини жойлаштириш бўйича ушбу беқарорлаштирувчи келишувдан чиқишга чақиради”, — дейилади ТИВ баёнотида.
Вазирлик ядровий мамлакатлар ўртасида тузилган ядро уруши ва қуролланиш пойгасининг олдини олиш тўғрисидаги декларацияни эслатди.
“Франция 2022 йил 3 январдаги Владимир Путин ҳамда ’Катта бешлик’нинг барча давлат ва ҳукумат раҳбарлари томонидан ядро уруши ва қуролланиш пойгасининг олдини олиш тўғрисида тузилган декларацияни амалга оширишга катта аҳамият беришини яна бир бор тасдиқлайди. Биз Россияни ядро қуроли эгаларидан кутилаётган масъулиятни намойиш этишга ва бу беқарорлаштирувчи келишувни қайта кўриб чиқишга чақирамиз”, — дейилади баёнотда.
25 март куни Россия президенти Владимир Путин беларуслик ҳамкасби Александр Лукашенко билан республика ҳудудида Россия ядро қуролини жойлаштириш бўйича келишувга эришганини эълон қилди. Қўшма Штатлар Владимир Путиннинг баёнотидан кейин Америка ядровий кучларининг тайёргарлигини ўзгартириш учун ҳеч қандай сабаб кўрмаётганини қайд этди. Германия Россия президентининг баёнотини “ядро билан қўрқитишга янги уриниш” деб ҳисобламоқда.
Европа дипломатияси раҳбари Жозеп Боррел, агар Россия Беларусда ядро қуролини жойлаштирса, унга қарши санкциялар билан таҳдид қилди. Украина ушбу масала бўйича БМТ Хавфсизлик кенгашининг навбатдан ташқари йиғилишини чақиришни талаб қилди.
Изоҳ (0)