Покистон полицияси 14 март куни собиқ бош вазир Имрон Хоннинг тарафдорлари билан сиёсатчининг шарқий Лаҳор шаҳридаг уйи олдида тўқнашди. Бу ҳақда Associated Press хабар берди.
Маълум қилинишича, 71 ёшли мухолифат етакчиси тарафдорлари полицияга тош ва ғишт улоқтирган, хавфсизлик хизмати эса уларга қарата кўздан ёш оқизувчи газ қўллаган. Ўнга яқин полициячи ва 35 га яқин Хон тарафдори яралангани айтилмоқда. Имрон Хоннинг тарафдорлари таёқ билан қуролланиб, у жойлашган резиденсияни ҳимоя қилишга уринмоқда. Хавфсизлик кучлари эса ҳужумга тайёргарлик кўрган.
Имрон Хон бош вазир бўлган вақтида олган совғалари ҳақидаги маълумотларни яширганликда ва давлат омборидан 630 минг долларлик қимматбаҳо буюмларни сотганликда айбланмоқда. 2022 йил апрель ойида парламентда ишончсизлик вотуми натижасида ҳокимиятдан четлатилган Хон ноябрь ойида Панжоб провинциясидаги намойишда қуролли ҳужум оқибатида яраланганидан бери судга боришдан қочади. У соғлиғи сабабли судда иштирок этиш учун Лаҳордан Исломободга бора олмаслигини билдирган.
Ўтган ҳафта у Исломободга учта судда иштирок этиш учун келган, бироқ порахўрлик иши бўйича суд жараёнини бошлаш учун тўртинчи судда қатнашмаган.
Хоннинг сўзларига кўра, унга нисбатан қўзғатилган қатор ишлар, жумладан, терроризм айблови Покистоннинг амалдаги бош вазири Шаҳбоз Шариф ҳукумати томонидан уни обрўсизлантиришга қаратилган фитнадир. Ўз навбатида, Шаҳбоз Шариф Хоннинг ҳибсга олиниши суд рухсати билан амалга оширилганини ва сиёсий таъқиб эмаслигини айтган.
“Биз уни ҳибсга оламиз ва буни суд қарори билан амалга оширамиз”, — деган у.
Хоннинг Покистон “Теҳрик-э-Инсаф” партиясининг юқори раҳбари Шоҳ Маҳмуд Қурейшининг айтишича, ҳукумат Хоннинг уйига полиция юбориб, қонун ва тартибни бузишга ҳаракат қилмоқда.
“Биз полиция билан музокаралар орқали ўрта йўл топишга тайёрмиз, аммо бугунги полиция рейдидан мақсад нима эканини билишимиз керак. Вазиятни ёмонлаштирманг. Келинг, ўтириб, нима истаётганингизни муҳокама қилайлик”, — деган Қурейши полицияга.
Унинг сўзларига кўра, Хон ўз ихтиёри билан ҳибсга олишни таклиф қилиши мумкин, аммо “биринчи музокара олиб бориш керак”.
Яна бир юқори мартабали партия етакчиси Фавад Чаудрининг айтишича, Хоннинг юридик гуруҳи Исломобод Олий судига сиёсатчини ҳибсга олиш ордерларини тўхтатиб туриш тўғрисида сўров юборади. Хоннинг адвокатлари Исломободдаги бошқа судда ҳам ордерларга эътироз билдирган. Имрон Хон бунинг фонида уйидан туриб тарафдорларини курашни давом эттиришга чақирган.
“Улар Имрон Хон қамоқда бўлганда, бу халқ ухлайди деб ўйлашади. Сиз уларнинг нотўғри эканини исботлашингиз керак”, — деган у.
Полициянинг айтишича, вазиятни назорат остига олиш учун қўшимча кучлар Хоннинг уйига йўл олган. Ижтимоий тармоқда тарқалган тасвирларда Хоннинг уйига кўздан ёш оқизувчи газлар тушгани акс этган.
“Биз уни суд қарори билан ҳибсга оламиз, у бундан қочмоқда”, — дейди ички ишлар вазири Рана Санауллоҳ Хон.
14 март куни Шариф ҳукумати Вазирлар Маҳкамаси томонидан тасдиқланган ўзгартиришларни киритиб, мансабдор шахсларга хизмат вақтида олинган қимматбаҳо давлат совғаларини сақлашни тақиқловчи қонунларга аниқлик киритди. Тақиқ шуни кўрсатадики, ҳеч бир мансабдор шахс, жумладан, мамлакат бош вазири, етакчи президент ва Вазирлар Маҳкамаси вазирлари 300 доллардан ошиқ совғани сақлаб қололмайди.
Тақиқда ҳар қандай совға олувчи ҳадяни бир ой ичида давлат омборида сақлаши керак. Бундан буён совғалар давлат мулки сифатида қабул қилинади.
Изоҳ (0)