Россиянинг Қора денгиз узра парвоз қилаётган Su-27 самолёти халқаро ҳаво ҳудудидаги АҚШнинг МQ-9 Reaper дронини уриб туширди. Бу ҳақда The Guardian хабар берди.
АҚШ Ҳарбий-ҳаво кучларининг Европа қўмондонлиги 14 март куни Россиянинг Su-27 самолёти Қора денгиздаги халқаро ҳаво ҳудудида “эҳтиётсизлик ва нопрофессионаллик” туфайли АҚШ дронини уриб туширганини маълум қилди.
Қўмондонлик баёнотида айтилишича, Марказий Европа (CEТ) вақти билан соат 07:03 да Россиянинг иккита Su-27 самолёти дронларни “хавфли ва нопрофессионал” тутиб олган. Баёнотда Россия самолётларидан бири МQ-9 винтига урилгани, оқибатда дрон уриб туширилгани келтирилади.
“Бизнинг МQ-9 самолётимиз Россия самолёти томонидан уриб туширилгунча халқаро ҳаво ҳудудида нормал операцияларни амалга ошираётганди”, — деди АҚШ Ҳарбий-ҳаво кучлари қўмондони генерал Жеймс Хекер.
Хекернинг қўшимча қилишича, АҚШ ва иттифоқчи самолётлар халқаро қонунларга мувофиқ халқаро ҳаво ҳудудида парвоз қилишда давом этади. Россия экипажининг ҳаракатлари “хавфли ва нотўғри ҳисоб-китобларга ва вазиятнинг беихтиёр кескинлашувига олиб келиши мумкин”, — деган генерал.
Оқ уй хабарига кўра, АҚШ президенти Жо Байден воқеа юзасидан хабардор қилинган. Уларнинг айтишича, Давлат департаменти бу борада Россия билан музокара олиб бормоқчи.
Изоҳ (0)