Украина прокуратураси Украинадаги ҳарбий жиноятларда гумон қилинган 600 нафар россиялик қўмондонга, жумладан, Россия президенти Владимир Путинга оид юзлаб маълумотларни тўплади. Бу ҳақда The Guardian хабар берди.
Прокурорлар The Guardian нашрига ўзлари тузган, узунлиги 4 метр ва эни 1,5 метр бўлган жадвал-схемасини кўрсатди. Унда Украинада жиноий иш қўзғатилган гумонланувчиларнинг исм-шарифлари ва фотосуратлари мавжуд. Россия мудофаа вазири Сергей Шойгу ва Путиндан тортиб ҳарбий унвонли мулозимларгача жадвалдан жой олган.
“Биз 2022 йили рус қўмондонлари ва генераллари ҳақида маълумот тўплашни бошладик. Бу маълумотларни ҳар ҳафта янгилаб борамиз”, — деди Харков вилояти бош прокурори Александр Филчаков.
Гумонланувчилар орасида Мариуполнинг уч ойлик қамалига раҳбарлик қилган генерал-полковник Михаил Мизинцев ҳам бор. Мариуполда Украина расмийлари 22 минг киши ҳалок бўлганини маълум қилган. Шаҳарнинг вайрон бўлиши “Россия бомбардимонлари натижасида вайронага айланган Суриядаги Ҳалаб қамалига” қиёсланган.
Мизинцев Суриядаги рейдларни бошқарган ва ҳарбий экспертларнинг фикрига кўра, у Мариуполда бу тажрибадан қисман фойдаланган. 2022 йил март ойида Британия ҳукумати Мизинцевга қарши шахсий санкциялар киритган.
Украина прокуратураси қўлида 64-алоҳида мотоўқотар бригада командири Азатбек Омурбеков (1983 йил Нукусда туғилган) ҳақидаги маълумот ҳам бор. Унинг бригадаси Бучада фаолият олиб борган ва унинг аскарлари тинч аҳолини ўлдириш, зўрлаш ва қийноққа солишда айбланмоқда.
Украина прокуратураси ҳарбий жиноятларга оид 67 минг ҳолат бўйича тергов олиб бораётгани ҳақида хабар берганди. Украина ташқи ишлар вазири Дмитрий Кулеба 14 март куни яна икки давлат Украинага қарши жиноятлар бўйича махсус трибунал яратиш коалициясига қўшилганини айтди. Аммо бу қайси давлатлар эканини очиқламади.
“Ҳозир 32 давлат Россиянинг олий сиёсий ва ҳарбий раҳбариятини жавобгарликка тортиш учун биргаликда ишламоқда. Путин ва унинг шериклари судга тортилади”, — деб ёзди Кулеба Twitter’даги саҳифасида.
Изоҳ (0)