Россия президенти Владимир Путин Украинадаги уруш ва бошқа мавзулар бўйича янги баёнот берди. Бу ҳақда “ТАСС” хабар берди.
Путин Улан-Уде авиация заводи ходимлари билан бўлган суҳбатда бу бўйича гапирди. У Россия ўз давлатчилигининг мавжудлиги учун курашаётганини ва бу омон қолиш вазифаси эканини таъкидлади. Россия президентининг асосий баёнотлари қуйидагилардан иборат:
- Ҳозирги халқаро муаммолар СССР парчаланганидан кейин бошланди;
- Ғарбнинг геосиёсий манфаатлари улар учун ҳатто СССР билан мафкуравий қарама-қаршиликлардан ҳам муҳимроқ бўлиб чиқди;
- СССР парчаланганидан кейин Ғарб Россияни тебратишга ҳаракат қилди, бешинчи колоннани яратди, халқаро террорчилар қўшинларини юборди;
- Россия ўнлаб йиллар давомида сабр-тоқат билан Украина билан муносабатларни тиклашга уринди, бироқ 2014 йилги давлат тўнтаришидан кейин вазият ўзгарди;
- Россия Украина билан муносабатларида ўзини катта рус дунёсининг бир қисми деб ҳисоблаганларга таянган. Аммо 2014 йилдан бошлаб уларни йўқ қилиш бошланди;
- Россия 8 йил давомида Донбасс муаммосини тинч йўл билан ҳал қилишга уриниб кўрди, лекин уни алдашди, “бурнидан судрашди”;
Шунингдек, Путин Россия кўп миллатли давлат экани, лекин Украинадаги рус дунёси учун курашиши, у ердаги одамларни ташлаб кета олмаслигини айтди. Россия дунёни яқинлаштириш, муваффақият ва ғалабага эришиш учун бирдамликни намоён қилиши кераклигини билдирди. У Россияга қарши қўлланилган санкциялар ҳақида ҳам тўхталиб, Ғарб санкциялардан кейин Москва икки-уч ҳафта ёки бир ой ичида қулаб тушишини кутганини айтди.
“Санкцияларнинг узоқ муддатли оқибатлари хавфи бор, аммо ҳаммаси яхши бўлиши кутилмоқда. Россия иқтисодий суверенитетининг бир неча баробар ўсиши 2022 йилнинг энг муҳим натижасидир. Мамлакатнинг молиявий тизими нафақат сақланиб қолди, балки мустаҳкамланди, барқарор ривожланмоқда”, — деган у.
Россия раҳбари маҳаллий бизнес кетаётган Ғарб компаниялари ўрнини “осонлик билан” эгаллаганини айтиб, Хитойга янги газ қувурининг ётқизилиши Россиянинг қўшни ҳудудларини ҳам газлаштириш имконини беришини қайд этди.
Изоҳ (0)