“Дарё” нашри 10 мартда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Нима учун Байден маъмурияти Россия жиноятлари далилларини халқаро судга бермоқчи эмас?
Пентагон Россиянинг Украинадаги жиноятлари ҳақидаги далилларни Халқаро жиноий суд билан бўлишишига тўсқинлик қилмоқда.
Ҳозирда америкалик ҳарбий раҳбарлар судга Россия терговида ёрдам беришга қарши, сабаби улар америкаликларни жиноий жавобгарликка тортилиши мумкинлигидан қўрқмоқда. Бу ҳақда The New York Times таҳлилларини кўриб чиқамиз.
“Байден маъмуриятидан ташқари разведка идоралари, Давлат ва Адлия департаментлари далилларни судга тақдим этишни маъқуллайди. Президент Байден ҳалигача боши берк кўчадан чиқиш йўлини топа олгани йўқ”, — дейилади хабарда.
Гап Халқаро жиноий суд бош прокурори Карим Хон томонидан бир йил аввал Россия босқинидан кейин бошланган тергов ҳақида кетмоқда. Далиллар орасида Россия расмийларининг фуқаролик инфратузилмасини атайлаб нишонга олиш ва минглаб украиналик болаларни босиб олинган ҳудуддан ўғирлаб кетиш ҳақидаги қарорлар материаллари мавжуд.
Айни вазиятда Жо Байден маъмурияти ёпиқ эшиклар ортида АҚШ буни қилиши керакми ёки йўқми деган сиёсий мунозаралар кетмоқда.
Зарбалар фонида Украина ҳаво ҳужумидан Мудофаа қуролларини қабул қилиб ола бошлади
Хабарингиз бор Россия томонидан Украина ҳудудларига деярли барча қанотли ракеталар билан зарбалар берила бошланди ва уларга Украина ҳаво мудофааси етарлича бардош беролмайди.
Сўнгги маълумотларга кўра, Украина Қуролли кучлари АҚШ ва Германия ваъда қилган ҳаво ҳужумидан мудофаа тизимларининг биринчи қисмини олди. Бу ҳақда Financial Times хабар бермоқда.
Нашр маълумотларига кўра, қабул қилинган комплексдан фойдаланиш ҳали бошланмаган. Нашрнинг аниқлик киритишича, ҳозирда Украина Нидерландиядан ҳам бир нечта Патриот ракета тизимлари етказиб берилишини кутмоқда.
2022 йилнинг кузидан бери Украинанинг энергетика инфратузилмасига зарбалар берилаётгани сабаб, Украинани ҳаво ҳужумидан мудофаа тизимлари билан таъминлаш зарурлиги бир неча бор таъкидланган.
2023 йил февралида Франция ва Италия ўрта масофага мўлжалланган зенит-ракета комплексларини Киевга топширишга ваъда берди. Айни пайтда Украинада Германия ва АҚШдан етказилган мудофаа тизимлари бор.
“Вагнер” таркибида урушга жўнатилган ўзбекистонликнинг жасади олиб келинди
Россия томонидан урушга юборилган ўзбекистонлик эркак ҳалок бўлди, қайд этилишича у 30 январь куни Украинада бўлаётган қуролли тўқнашувга жўнатилган. Элликқалъалик 43 ёшли Ф.Х. жасади ҳозирда Ўзбекистонга олиб келинди.
2019 йил ноябрь ойида ишлаш учун Россияга кетган ўзбекистонлик ўша йилнинг декабрь ойида жанжал сабаб қамоққа олинган ва 5 йилга озодликдан маҳрум этилган. Фуқаро Ф.Х. Россияда яшайдиган синглисига ўзини қамоқдан Украинадаги урушга юборишмоқчилигини айтган ва 2022 йил декабридан бошлаб у алоқага чиқмай қўйган.
Ушбу шахс билан таниш бўлган инсонларнинг айтишича, у ишлаган жойга снаряд келиб тушган. Марҳумнинг укаси жасадга жиддий шикаст етгани сабаб уни таниб бўлмагани ва акасини бўйнидаги чандиқ орқали ажратиб олганини айтган.
Аввалроқ “Вагнер”чиларнинг 90 фоизи маҳбуслардан иборат экани маълум қилинганди. Ҳозирда “Вагнер” чеченистонлик маҳбусларни ҳам Украинага қарши урушга жалб қилишни бошлаган.
Эслатиб ўтамиз декабрь ойида Украина Қуролли кучлари, Россия урушдаги йўқотишларини Ўзбекистон ва Тожикистондан келган меҳнат муҳожирлари ҳисобига тўлдираётганини қайд этган.
Ўзбекистонда янги конституция бўйича референдум ўтказилади
10 март, яъни бугун янги таҳрирдаги “Конституция тўғрисида”ги қонун лойиҳаси референдумини ўтказиш ҳақида қарор қабул қилинди. Унга кўра, референдум 2023 йилнинг 30 апрель, якшанба куни ўтказилади.
Бугун Олий Мажлис Қонунчилик палатасининг “Ўзбекистон Республикаси Конституцияси тўғрисида”ги конституциявий қонун лойиҳаси муҳокама қилинди. Хусусан, конституция лойиҳасининг 18-моддаси 1-қисми бўйича депутат Нодира Жонибекованинг таклифи муҳокама қилиниб, ушбу қисм янги таҳрирда эълон қилинди. Яъни “Ўзбекистон Республикаси давлатлар ва халқаро ташкилотлар билан икки ва кўп томонлама муносабатларни ривожлантиришга қаратилган тинчликсевар ташқи сиёсатни амалга оширади”.
Шунингдек, Конституция лойиҳасининг 26-моддаси 3-қисмига қуйидаги жумла қўшилди: “Ҳеч нарса инсон шаъни ва қадр-қимматини камситиш учун асос бўлиши мумкин эмас”.
Изоҳ (0)