Эрон ва Саудия Арабистони етти йил ўтиб дипломатик муносабатларни нормаллаштиришга келишиб олди. Бу ҳақда Ирна хабар берди.
Маълум қилинишича, давлатлар икки ой ичида ўз элчихоналарини қайта ишга туширади. Эрон Миллий хавфсизлик олий кенгаши котиби ва унинг саудиялик ҳамкасби Пекинда музокара ўтказди. Натижада уч томонлама баёнот қабул қилинди.
Эслатиб ўтамиз, Саудия Арабистони 2016 йилда Ар-Риёдда шиа воизчиси қатл этилганидан сўнг Эрон билан дипломатик алоқаларни узган эди. Бунга жавобан қатор Эрон етакчилари Ар-Риёдга нисбатан кескин баёнотлар билан чиққан. Саудия Ташқи ишлар вазирлиги Эрон элчисини чақириб, унга норозилик билдирган.
2022 йил сентябрь ойида Саудия Арабистони валиаҳд шаҳзодаси Муҳаммад бин Салмон Ар-Риёд ва Теҳрон қўшничилик муносабатларига эга бўлиши кераклигини айтди. Аммо Эронда тартибсизликлар бошланганидан кейин мамлакат расмийлари Саудия Арабистонини намойишчиларни қўллаб-қувватлаганликда айблади.
Изоҳ (0)