АҚШ марказий разведка бошқармаси директори Уилям Бернс Россиянинг Украинадаги уруши Хитойнинг Тайванни босиб олиш ҳақидаги фикрига таъсир қилган бўлиши мумкинлигини айтди. Бу ҳақда CNN хабар берди.
Вакиллар палатасида бўлиб ўтган глобал таҳдидларни тинглаш чоғида Бернс Украинадаги воқеаларни Хитой раҳбари Си Цзиньпиндан бошқа ҳеч ким диққат билан кузатмаганини айтди.
“Менимча, Владимир Путиннинг Украинадаги тажрибасини ҳеч ким Си Цзиньпиндан кўра диққат билан кузатмаган ва у маълум даражада ҳушёр тортди. Чунки Ғарб бирдамликни сақлаб, қисқа муддатли иқтисодий харажатларнинг бир қисмини кўтара олди”, — дейди у.
Бернснинг сўзларига кўра, Хитой раҳбари жаҳон иқтисодиётининг қолган қисми билан ўзаро алоқада бўлишга ва пандемиядан кейин ўз мамлакатининг иқтисодий ўсиш суръатларини тиклашга уринаётганда буни эътиборга олиши керак.
Аввалроқ Уилям Бернс Хитой 2027 йилда Тайванга қарши урушга тайёргарлик кўриши мумкинлигини айтганди, аммо бу босқин ҳақиқатда содир бўлади дегани эмаслигини билдирган.
“Хитойнинг Тайванга нисбатан ниятини эътибордан четда қолдирмаслик керак, бироқ Украинадаги уруш Пекинни ‘хотиржам қилди’”, — дейди у.
НАТО Бош котиби Йенс Столтенберг ҳам Хитой Россиянинг Украинага қарши урушини диққат билан кузатаётганини ва келажакдаги қарорларга, хусусан, Тайванга нисбатан таъсир кўрсатиши мумкин бўлган сабоқларни олаётганини айтди.
“Агар Путин Украинада ғалаба қозонса, бу авторитар режимлар қўпол куч билан ўз мақсадларига эришиши мумкинлигидан далолат беради. Бу хавфли”, — деган Столтенберг.
Изоҳ (0)