Тбилисида махсус кучлар Руставели проспектидаги Грузия парламенти биносига киришга уринган намойишчиларга қарши сув пуркагичлар ва кўзни ёшлатувчи газ ишлатди, деб ёзмоқда Meduza.
Грузиялик депутатлар томонидан кўриб чиқилаётган “хорижий агентлар” тўғрисидаги қонун лойиҳасига қарши бўлганлар 8 март оқшомида яна шаҳар марказига тўпланишди.
Митингда “Стратегия Агмашенебели” партияси етакчиси Георгий Вашадзе ҳукуматга ультиматум қўйиб, қонун лойиҳасини бир соат ичида қайтариб олишни ва 7 март кунги намойишда ҳибсга олинганларнинг ҳаммасини озод қилишни талаб қилди. Ультиматум муддати тугаганидан кейин у депутатларнинг 9 март кунги йиғилишига йўл қўймаслик учун намойишчиларни парламент биносини ўраб олишга чақирди.
Полиция махсус жиҳозларни қўллаганидан сўнг, намойишчилар парламент биносидаги деразаларни синдириб, панжараларни бузишга киришди.
Натижада махсус кучлар митингни куч билан тарқатишни бошлади ва намойишчиларни парламент яқинидаги майдонни тарк этишга мажбур қилди.
7 март куни Грузия парламенти мамлакатда танқидлар тўлқинига сабаб бўлган “хорижий агентлар” тўғрисидаги қонун лойиҳасини биринчи ўқишда қабул қилганди. Овоз бериш чоғида Тбилисидаги Руставели проспектидаги парламент биноси ёнида бир неча минг киши йиғилди. Полиция намойишчиларни сув пуркагичлар ва кўзни ёшлатувчи газ ёрдамида куч билан тарқатди. Якунда майда безорилик ва ички ишлар органларига бўйсунмаслик бўйича маъмурий моддалар билан иш қўзғатилган 76 нафар шахс қўлга олингани маълум қилинди. Яна бир намойишчи полициячига ҳужум қилганликда айбланиб, ҳибсга олинган.
“Хорижий агентлар” тўғрисидаги қонун лойиҳасига мувофиқ, Грузияда “хорижий агентлар” реестри пайдо бўлади ва унга 10 фоиздан ортиқ қисми хориждан молиялаштириладиган барча нотижорий юридик шахслар ва ОАВлар киритилади.
Қонун лойиҳасининг иккинчи вариант — “Хорижий агентларни рўйхатга олиш тўғриси”даги ҳужжатга овоз бериш 9 март куни бўлиб ўтади.
Изоҳ (0)