Украина ҳукумати илк бор АҚШдан дронлардан ташлаб портлатиш учун МК-20 кассетали авиабомбаларни сўради. Бу ҳақда Reuters агентлигига АҚШ конгрессменлари Жейсон Кроу ва Вакиллар палатаси Қуролли кучлар қўмитасида хизмат қилувчи Адам Смитга таяниб, хабар берди.
Украина февраль ойида Мюнхен хавфсизлик конференциясида 155 та кассетали артиллерия ўқларига қўшимча равишда МК-20 бомбаларини сўраган.
Киев Конгресс аъзоларини қуролнинг жўнатилишини маъқуллаш учун Оқ уйга таъсир ўтказишга чақирган, аммо АҚШ президенти Жо Байден маъмурияти бу илтимосга рози бўладими ёки йўқ, ҳозирча номаълум, таъкидлади агентлик.
Reuters хабарига кўра, Киев кассетали ўқ-дорилар Украина шарқидаги рус қўшинларига қарши курашда устунлик беришига умид қилмоқда.
Январь ойида Фореигн Полиcй нашри Америка ва Европа расмийларига таяниб, Туркия 2022 йил охиридан бошлаб Украинага АҚШ томонидан ишлаб чиқилган кассетали артиллерия ўқ-дориларини юборишни бошлаганини ёзганди. Декабрь ойида CNN телеканали Украина расмийлари ва қонун чиқарувчилари АҚШдан уларга шундай ўқ-дорилар беришни сўрагани ҳақида хабар берди.
Киев узоқ вақт Вашингтондан бундай ўқларни олишга уриниб кўрди, аммо сўровлар рад этилди — АҚШ қонунга мувофиқ ушбу қуролларни экспорт қила олмайди.
Кассетали ўқ-дорилар
Кассетали ўқ-дорилар катта ҳудудларга таъсир қилувчи кўплаб кичикроқ мустақил портловчи қурилмаларни олиб юради, улар тинч аҳолига таҳдид солиб, катта майдонга беихтиёр зарба бериши мумкин. Шу билан бирга, бундай ўқлар узоқ йиллар давомида портламаслиги мумкин, шунинг учун улар тинч аҳоли учун хавф туғдиради.
Ушбу турдаги қуролдан фойдаланиш 2010 йилда кучга кирган Кассетали ўқлар тўғрисидаги конвенсия билан тақиқланган. Унга 123 та давлат имзо чеккан. Шу билан бирга, на АҚШ, на Украина, на Россия унинг иштирокчиси ҳисобланади. Қўшма Штатлар кассетали ўқ-дорилардан фойдаланишни 2016 йилдан бошлаб тўхтатган. Хабарларга кўра, Россия Украинадаги урушда ушбу турдаги қуроллардан фаол фойдаланмоқда.
Изоҳ (0)