Хитой ташқи ишлар вазири Цинь Ган АҚШни Украина ва Тайванга нисбатан муносабати туфайли икки томонлама стандартларда айблади. Вазир бу ҳақда Бутунхитой халқ вакиллари кенгаши сессиясидаги нутқида гапирди.
Цинь Ганнинг айтишича, АҚШ Хитойдан Украинадаги уруш учун Россияга қурол етказиб бермасликни талаб қилмоқда, аммо уларнинг ўзи Тайванга қурол етказиб бермоқда. Унинг сўзларига кўра, АҚШ Украина суверенитети ва ҳудудий яхлитлигини ҳурмат қилади, бироқ айни пайтда Хитойнинг ҳудудий яхлитлигини эътиборсиз қолдиради.
“Хитой халқи жўяли саволлар беради. Нима учун Украина ҳақида гап кетганда, АҚШ суверенитет ва ҳудудий яхлитликни ҳурмат қилиш ҳақида гапиради, Тайван ва Хитой масаласига келганда эса, улар ХХРнинг суверенитети ва ҳудудий яхлитлигини ҳурмат қилмайди. Нега Хитойдан Россияга қурол етказиб бермасликни талаб қилишмоқда, лекин 17 августдаги (1982 йилги) консенсусни бузган ҳолда, анчадан бери Тайванга қурол сотишмоқда?” — таъкидлади Цинь Ган.
Хитой ҳукумати Тайван масаласини қизил чизиқ деб билади, шунинг учун Вашингтон уни ҳал қилишга ҳар қайси ҳолатда аралашишга уринмаслиги керак, дея қўшимча қилди у.
Хитой Тайванни ўз провинцияси деб ҳисоблайди ва АҚШ расмийларининг оролга ташрифларини унинг Хитойдан мустақил бўлишини қўллаб-қувватлаш деб билади. Хитой Мудофаа вазирлиги Тайван учун курашишга тайёр эканини бир неча бор таъкидлаган, АҚШ президенти Жо Байден эса оролни ҳарбий йўл билан ҳимоя қилишга тайёрлиги ҳақида гапирган. АҚШнинг бир қанча амалдаги юқори мартабали ҳарбий амалдорлари вазият икки куч ўртасида бевосита урушга олиб келиши мумкинлигидан огоҳлантирган.
Изоҳ (0)