Туркия Бош прокуратураси суддан 2022 йилнинг 13 ноябрь куни Истанбулнинг Истиқлол кўчасида теракт содир этган Сурия фуқароси Аҳлам Альбаширга уч минг йиллик қамоқ жазоси тайинлашни сўради. Бу ҳақда Туркиянинг Anadolu ахборот агентлиги хабар бермоқда.
Қайд этилишича, айблов хулосасида Бош прокуратура жиноятнинг қасддан ва давлатга қарши уюштирилгани сабабли суриялик аёл учун 7 карра умрбод қамоқ жазосини талаб қилган. Ҳуқуқ-тартибот идоралари маълумотларига кўра, портловчи мослама солинган сумкани айнан Альбашир қолдирган, кейин у портлаб кетган. Теракт иши бўйича суд мажлислари 2023 йил 9—11 май кунлари Истанбул судида бўлиб ўтади.
Аввалроқ Истиқлол кўчасида теракт тайёрлашга алоқадорликда гумон қилинган 17 нафар шахс қўлга олинган эди. Ҳибсга олинганлар давлат бирлиги ва яхлитлигини бузиш, қасддан қотиллик ва суиқасдда айбланган.
Истанбулдаги теракт оқибатида саккиз киши ҳалок бўлган, 81 киши жароҳатланганди. Мамлакат ички ишлар вазирлиги портлаш ортида Туркияда террорчи ташкилот деб тан олинган Курдистон ишчилар партияси (КИП) тарафдорлари турганини айтди.
КИП 1984 йилдан бери Туркия ҳукуматига қарши турли воситалар билан уруш олиб бормоқда. Мамлакатнинг асосан курдлар яшайдиган жануби-шарқида КИП жангарилари хавфсизлик кучлари ва расмийларга ҳужумлар уюштирмоқда. Ироқ ва Сурия шимолида КИПнинг базалари мавжуд бўлиб, Туркия Қуролли кучлари уларга қарши ҳаво ва қуруқликдаги амалиётлар ўтказиб туради.
Изоҳ (0)