Украина Россияга ҳужум қиладими? Зеленский офиси жавоб берди
Украина президенти офиси маслаҳатчиси Михаил Подоляк мамлакат армиясининг Россияга қарши ҳужум қилиш эҳтимолини баҳолади. Сиёсатчи Twitter’даги саҳифасида бу ҳақда твит қолдирди.
Подолякнинг таъкидлашича, Украина мудофаа урушини олиб бормоқда ва Россия ҳудудига зарба бермайди. Россияда дрон ҳужумлари билан боғлиқ ҳодисалар эса россияликлар орасида ваҳима жараёни билан боғлиқ.
“Украина Россия ҳудудига зарба бермайди. Украина ўзининг барча ҳудудларини қайтариб олиш учун мудофаа урушини олиб бормоқда. Россияда ваҳима жараёнлари кучаймоқда, бу номаълум дронларнинг мамлакат инфратузилма объектларига ҳужумида намоён бўлмоқда”, — деди сиёсатчи.
Аввалроқ Украина Миллий хавфсизлик ва мудофаа кенгаши котиби Алексей Данилов урушнинг тугаш шартини айтганди. У Украина танклари Москвадаги Қизил майдонда бўлганида уруш тугаши ва бу адолатли ечим бўлишини таъкидлаган. Данилов Кремл Украинани Шимолий ва Жанубий Корея каби парчалаб, Россияга ғалаба иллюзиясини тақдим этиш ниятидалигини қўшимча қилган.
1 март куни Россия Мудофаа вазирлиги Украина дронларининг Қрим ярим ороли объектларига оммавий ҳужуми олди олингани ҳақида хабар берди. Ҳодиса оқибатида ҳеч ким жабрланмагани қайд этилди. Украина мазкур маълумотга ҳали муносабат бермади.
