Покистон делегациясининг Тошкентга ташрифи доирасида Ўзбекистон инвестициялар, саноат ва савдо вазири Лазиз Қудратов Покистон молия вазири Ишоқ Дар билан учрашди.
Учрашувда трансафғон темирйўли қурилиши лойиҳасининг боришини тезлаштириш бўйича келишувга эришилди.
Бошқа келишилган чора-тадбирлар қаторида мултимодал юк ташиш ҳажмини ошириш, маҳсулотларни учинчи давлатлар бозорларига биргаликда экспорт қилиш учун ҳар икки давлат ҳудудларида терминаллар ташкил этиш киради.
Шунингдек, банклараро алоқаларни кенгайтириш имкониятлари муҳокама қилинди. Марказий банклар ўртасида SWAP операциялари механизмини жорий этиш, икки мамлакат молия институтлари ўртасида вакиллик банк муносабатларини ривожлантириш бўйича чора-тадбирлар кўриш бўйича келишувга эришилди.
Аввалроқ Шавкат Мирзиёев ҳам Покистон Молия вазири билан учрашувда трансафғон темирйўлини тезлаштириш кераклигини айтиб ўтган эди. Лояҳининг таҳминий қиймати 5 млрд долларни ташкил қилади.
Узунлиги 600 километр бўлган темирйўл Марказий Осиё мамлакатлари учун Покистоннинг йирик денгиз портларига чиқиш йўлини очиб беради. Бу эса минтақавий алоқа ва савдони ривожлантиришга хизмат қилади.
Лойиҳа тўлиқ амалга оширилгач, Покистондан Ўзбекистонга юк ташиш 35 эмас, 3-5 кун давом этади.
Бундан ташқари битта стандарт контейнерни ташиш нархи қарийб уч баробарга арзонлашиши кутилмоқда.
Шу билан бирга, прогнозларга кўра, ушбу йўналиш бўйлаб юк ташиш ҳажми 10 миллион тоннага етиши мумкин.
Изоҳ (0)