АҚШ миллий хавфсизлик бўйича маслаҳатчиси Жейк Салливан Россиянинг Украинага кенг кўламли босқини бошланганига бир йил тўлиши муносабати билан тайёрланган CNN махсус кўрсатувида Россия “бу урушда аллақачон мағлуб бўлганини” айтди.
“Россиянинг бу урушдаги мақсадлари Украинани дунё харитасидан ўчириш, пойтахтни эгаллаш ва Украинани йўқ қилиш, уни ютиб юбориш эди”, — деди Салливан. “Улар муваффақиятга эриша олмади ва буёғига ҳам эриша олмайди”.
Салливан, шунингдек, Қўшма Штатлар Украинага зарур бўлган ҳарбий ёрдамни бериш учун барча имкониятларни ишга солишини айтди. Бироқ унинг сўзларига кўра, Украина сўраётган Ф-16 қирувчи самолётлари ҳозирда “асосий эҳтиёж” эмас.
“Ф-16 — Украинани қисқа муддатли курашда эмас, балки узоқ муддатли ҳимоя қилиш масаласи”, — деди у.
АҚШ Украинанинг асосий иттифоқчиси ҳисобланади. Россиянинг кенг кўламли босқини бошланганидан бери Қўшма Штатлар Украинага бир неча миллиард долларлик ҳарбий ёрдам пакетларини тақдим этди. Урушнинг йиллиги муносабати билан яна 2 миллиард долларлик ёрдам пакети эълон қилинди, у Украина қўшинлари учун қурол ва ўқ-дориларни ўз ичига олади.
Изоҳ (0)