Польша ҳукумати Россия ва Беларусь билан чегараларда мудофаа тўсиқларини ўрнатишга қарор қилди. Бу ҳақда Польша мудофаа вазири Мариуш Блашак Twitter’да хабар берди.
“Россия ва Беларусь билан чегарада хавфсизлик чораларини профилактик кенгайтиришни бошладик. Бу мудофаа ва олдини олиш стратегиямизнинг бир қисми. Дастлабки истеҳкомлар Калининград вилояти билан чегарада қурилмоқда”, — деди Блашак.
У Польша—Россия ва Польша—Беларусь чегараларида назорат-ўтказиш пунктлари яқинидаги йўлда металл ва бетондан ясалган танкка қарши тўсиқларнинг бир нечта фотосуратларни эълон қилди.
2021 йилда Польша миграция инқирози туфайли Беларусь билан чегарада девор қуришни бошлаганди. Девор қурилиб битказилгани ҳақида 2022 йилнинг кузида эълон қилинди.
2022 йил февраль ойида Польша мудофаа вазири ўринбосари Войцех Скуркевич Россия билан чегарада ҳам девор қурилиши ҳақида маълум қилганди. Калининград вилояти ҳукумати матбуот хизмати раҳбари Дмитрий Лисковнинг айтишича, гап девор эмас, балки тўсиқ ҳақида кетмоқда.
Изоҳ (0)