Россия президенти Владимир Путин 2021 йилнинг июнь ойида Женева саммитида АҚШ президенти Жо Байденга 12 минг долларлик ручка ва ёзув тўпламини совға қилган, дейилади АҚШ Давлат департаменти Протокол бошқармасининг йиллик ҳисоботида.
Давлат департаменти ҳисоботида совға тўплами “Рус халқ рассомчилиги миниатюра ёзув тўплами ва ручка” деб таърифланган. Қайд этилишича, совғани қабул қилмаслик “берувчи давлат ва АҚШни шарманда қилар эди”. Шунингдек, бу 2021 йилда Байденга берилган энг қиммат совға бўлган.
Путин ва Байден ўртасидаги музокаралар 2021 йил 16 июнь куни Женевадаги Villa La Grange вилласида бўлиб ўтганди. Саммитнинг биринчи қисми тор доирада ўтказилган – унда президентлардан ташқари Россия ташқи ишлар вазири Сергей Лавров ва АҚШ Давлат котиби Энтони Блинкен ҳам иштирок этган. Иккинчи қисм кенгайтирилган таркибда ўтказилган. Жами ҳисобда, саммит тўрт соатча давом этган.
Якунда, президентлар ўзаро совға алмашишган: Байден Россия раҳбарига Америка бизонининг биллур ҳайкалчаси ва авиатор кўзойнакларини, Путин эса Миллий нақшлар туширилган “Москва” ёзув тўпламини совға қилган.
Изоҳ (0)