“Rossiya bu urushda allaqachon mag‘lub bo‘ldi” — AQSH prezidentining milliy xavfsizlik bo‘yicha maslahatchisi Ukrainadagi urushning bir yili haqida

AQSH milliy xavfsizlik bo‘yicha maslahatchisi Jeyk Sallivan Rossiyaning Ukrainaga keng ko‘lamli bosqini boshlanganiga bir yil to‘lishi munosabati bilan tayyorlangan CNN maxsus ko‘rsatuvida Rossiya “bu urushda allaqachon mag‘lub bo‘lganini” aytdi.

“Rossiyaning bu urushdagi maqsadlari Ukrainani dunyo xaritasidan o‘chirish, poytaxtni egallash va Ukrainani yo‘q qilish, uni yutib yuborish edi”, — dedi Sallivan. “Ular muvaffaqiyatga erisha olmadi va buyog‘iga ham erisha olmaydi”.

Sallivan, shuningdek, Qo‘shma Shtatlar Ukrainaga zarur bo‘lgan harbiy yordamni berish uchun barcha imkoniyatlarni ishga solishini aytdi. Biroq uning so‘zlariga ko‘ra, Ukraina so‘rayotgan F-16 qiruvchi samolyotlari hozirda “asosiy ehtiyoj” emas.

“F-16 — Ukrainani qisqa muddatli kurashda emas, balki uzoq muddatli himoya qilish masalasi”, — dedi u.

AQSH Ukrainaning asosiy ittifoqchisi hisoblanadi. Rossiyaning keng ko‘lamli bosqini boshlanganidan beri Qo‘shma Shtatlar Ukrainaga bir necha milliard dollarlik harbiy yordam paketlarini taqdim etdi. Urushning yilligi munosabati bilan yana 2 milliard dollarlik yordam paketi e’lon qilindi, u Ukraina qo‘shinlari uchun qurol va o‘q-dorilarni o‘z ichiga oladi.