Rossiya prezidenti Vladimir Putin 2021-yilning iyun oyida Jeneva sammitida AQSH prezidenti Jo Baydenga 12 ming dollarlik ruchka va yozuv to‘plamini sovg‘a qilgan, deyiladi AQSH Davlat departamenti Protokol boshqarmasining yillik hisobotida.
Davlat departamenti hisobotida sovg‘a to‘plami “Rus xalq rassomchiligi miniatyura yozuv to‘plami va ruchka” deb ta’riflangan. Qayd etilishicha, sovg‘ani qabul qilmaslik “beruvchi davlat va AQSHni sharmanda qilar edi”. Shuningdek, bu 2021-yilda Baydenga berilgan eng qimmat sovg‘a bo‘lgan.
Putin va Bayden o‘rtasidagi muzokaralar 2021-yil 16-iyun kuni Jenevadagi Villa La Grange villasida bo‘lib o‘tgandi. Sammitning birinchi qismi tor doirada o‘tkazilgan – unda prezidentlardan tashqari Rossiya tashqi ishlar vaziri Sergey Lavrov va AQSH Davlat kotibi Entoni Blinken ham ishtirok etgan. Ikkinchi qism kengaytirilgan tarkibda o‘tkazilgan. Jami hisobda, sammit to‘rt soatcha davom etgan.
Yakunda, prezidentlar o‘zaro sovg‘a almashishgan: Bayden Rossiya rahbariga Amerika bizonining billur haykalchasi va aviator ko‘zoynaklarini, Putin esa Milliy naqshlar tushirilgan “Moskva” yozuv to‘plamini sovg‘a qilgan.
Izoh (0)