Украина президенти Владимир Зеленский Хитойнинг тинчлик режасига муносабат билдириб, Хитой томонига дипломатлар даражасида учрашув ўтказиш сўрови юборилганини маълум қилди. Бу ҳақда УНИАН хабар берди.
Зеленский Киевда Испания бош вазири Педро Санчес билан бўлиб ўтган қўшма брифингда журналистларнинг Хитой таклиф қилган тинчлик режаси бўйича саволига жавоб берган.
“Мен Хитойнинг тинчлик режаси бўйича фақат умумий нарсаларни биламан, мамлакатларимиз дипломатлари учрашишди. Ҳужжатни кўрмадим. Шу учун бу ҳужжатга ‘ташхис қўйиш’га ҳали эрта”, — деди у.
Президентнинг сўзларига кўра, Хитойнинг Украина ҳақида гапира бошлагани ва “айрим сигналлар” юборилаётгани яхши.
“Биз учун давлатларнинг Украина томонда — адолат тарафида бўлиши муҳим. Шунга қарамай, Хитой бу ҳақда гапирмоқда, бу дастлабки қадамлар. Лекин улар таклиф қилаётган режанинг ўзига хос жиҳатларини кўрганимиздан кейин қандайдир хулоса чиқарамиз, шундан кейин нимадир аниқ бўлади”, — деди сиёсатчи.
Унинг сўзларига кўра, Украина Хитой билан учрашса маъқул бўларди.
“Дипломатлар даражасида бу сигнални Хитойга узатдик. Хитой расмийлари билан учрашмоқчимиз, бу ҳозирда Украина манфаатларига мос келади. ‘Тинчлик формуласида’ қанча давлатлар иштирок этса, шунча кўп давлат Украинадаги урушни суверенитетимизни ҳурмат қилган ҳолда, адолат билан тугатади”, — деди Зеленский.
Эслатиб ўтамиз, Хитой Украинадаги урушни тугатиш бўйича “тинчлик режаси”ни эълон қилганди, у “барча мамлакатлар суверенитети”ни ҳурмат қилган ҳолда яратилгани таъкидланган. Украина ташқи ишлар вазири Дмитрий Кулеба Хитойнинг Украинадаги урушни тугатиш режасини ўқимай туриб гапиришдан маъно йўқлигини айтган.
Изоҳ (0)