Бирлашган Миллатлар Ташкилоти Бош Ассамблеяси Украинадаги урушнинг бир йиллиги муносабати билан Украина ва унинг иттифоқчилари томонидан таклиф этилган, Россияни Украина ҳудудидаги ҳарбий ҳаракатларни тўхтатиш ва у ердан қўшинларни олиб чиқишга чақирувчи резолюцияни қўллаб-қувватлади. Бу ҳақда БМТнинг Twitterъдаги саҳифаси хабар берилди.
Резолюцияни қабул қилиш учун 141 давлат овоз берди. Яна 32 давлат, жумладан, Ўзбекистон овоз беришда бетараф қолди. Етти давлат – Россия, Беларусь, Сурия, Шимолий Корея, Эритрея, Никарагуа ва Мали ҳужжатга қарши овоз берди.
The UN General Assembly adopted a resolution that demands #Russia leave #Ukraine.
— UN News (@UN_News_Centre) February 23, 2023
In favour: 141
Against: 7
Abstentions: 32 pic.twitter.com/WnEoRp94kx
“Европа ҳақиқати” ёзишича, резолюция Украина президенти Владимир Зеленскийнинг 2022 йил кузида G20 саммитида тақдим этган “тинчлик формуласи” тамойилларига асосланади.
Шу билан бирга, “РБК-Украина” нашри резолюция кенгроқ ва “тинчлик формуласи”га қараганда камроқ тафсилотларни ўз ичига олишини ёзмоқда. Ундаги матн БМТ Бош Ассамблеясида кўпроқ мамлакатларнинг қўллаб-қувватловини олиш мақсадида ўзгартирилган.
Бирлашган Миллатлар Ташкилоти Бош Ассамблеяси томонидан қабул қилинган резолюциялар халқаро ҳуқуқ доирасида мажбурлаш кучига эга эмас.
Россия Украинага кенг миқёсли босқин бошлаганидан бери Бош Ассамблея Россиянинг ҳарбий агрессиясини қораловчи камида тўртта резолюцияни қабул қилди.
Изоҳ (0)