Самарқанд вилояти Ургут туманида мактаб ўқувчиси олиб қочган машина ботқоқликдан топилди. Бу ҳақда вилоят Ички ишлар бошқармаси ахборот хизмати хабар берди.
Хабарга кўра, Ургут тумани “Қуйикамонгарон” маҳалласида яшовчи фуқаро туман ички ишлар бўлимига мурожаат қилиб, 18 февраль куни соат тахминан 21:00 ларда уйи олдига қўйган Lacetti йўқолганини айтган. Ҳодиса содир бўлган жойга Йўл-патрул хизмати ва тергов гуруҳи етиб келган. Ҳодиса содир бўлган жой кўздан кечирилганда, машинанинг эшик очқичи синиқ бўлаклари, елим труба ва энергетик ичимлик идиши аниқланиб, тегишли тартибда ҳужжатлаштириб олинган.
Мазкур ҳолат юзасидан туман ички ишлар бўлими ҳузуридаги тергов бўлими томонидан номаълум шахсга нисбатан Жиноят кодексининг 267-моддаси 1-қисми билан жиноят иши қўзғатилган. Олиб борилган суриштирув ишлари давомида ҳолат вояга етмаган бола томонидан амалга оширилгани аниқланган.
Мактабда 8-синфда ўқувчи А.Г. Lacetti’нинг эшигини елим труба орқали очиб, унинг калити ўзида турганидан фойдаланган. Машинани “Чорчинор” маҳалласи томонга бошқариб кетаётганда йўлнинг лой қисмида ғилдираклари ботиб қолган. Шу вақт у машинани ботқоқликдан чиқаришга уринаётган пайтда қўлга олинган. Ҳолат юзасидан жиноят иши қўзғатилиб, тергов ҳаракатлари олиб борилмоқда.
“Тумандаги мактабда 8-синфда ўқийман. Кеча соат 02:00 ларда уйдан рухсат сўрамай чиқдим. Бир машинага кўзим тушди. Ёнида катта труба бор экан. Калити ичидалиги учун эшикни труба орқали очиб, ҳайдаб кетдим. Ботқоқликка ботиб қолдим. Эгасига қайтариб олиб келмоқчи эдим. Ички ишлар ходимлари келиб, мени олиб кетиб қолишди. Ишимдан қаттиқ пушаймонман”, дейди машинани олиб қочган бола.
Изоҳ (0)