Украинадаги урушнинг натижаси номаълум, аммо ҳозирда Россия раҳбари Владимир Путин ўз амбицияларини ўзгартиргани борасида ҳеч қандай аломат йўқ. Бу ҳақда НАТО бош котиби Йенс Столтенберг маълум қилди.
“Биз бунинг аксини кўрмоқдамиз. У тинчликни хоҳламайди. У янги урушни режалаштирмоқда”, — дея таъкидлади НАТО етакчиси.
У Россия аллақачон янги ҳужум амалиётларини бошлаганини айтиб, Бахмут ҳудудидаги ҳарбий тўқнашувларга ишора қилди.
“Бу йирик баҳорги ҳужумми ёки шунчаки унинг муқаддимасими, айтиш қийин. Лекин улар тобора кўпроқ қўшин ва кўпроқ қурол-яроғларни тортиб келмоқда”, — деди НАТО бош котиби.
Столтенбергнинг қўшимча қилишича, Россия ҳарбий хизматчилар сонини ошириш билан қониқарсиз жиҳозлар ва ёмон логистика таъминотини хаспўшлашга ҳаракат қилмоқда.
Алянс вакили буни “мудофаа чизиғига одамлар тўлқинини ташлаш” деб атади. У, шунингдек, бундай жанглар Биринчи жаҳон урушидан бери кузатилмаганини таъкидлади.
Унинг сўзларига кўра, Украинанинг ғалабаси учун Киевга ҳарбий ёрдам кўрсатишни давом эттириш керак.
Аввалроқ Столтенберг Украинанинг НАТОдаги истиқболини тасдиқлаган эди. Шу билан бирга, у Украинанинг урушдаги ғалабаси мамлакатни интеграциялаш ва Евроатлантика ҳамжамиятига тўлиқ қўшишнинг ягона йўли эканини айтган.
Изоҳ (0)