Дональд Трамп агар АҚШдаги келгуси президентлик сайловларида ғалаба қозонса, россиялик ва украиналик ҳамкасблари Владимир Путин ҳамда Владимир Зеленскийга ҳарбий можарони ҳал қилиш масаласида қўнғироқ қилади. Америка собиқ президенти Флоридадаги тарафдорлари олдида сўзлаган нутқида шундай ваъда берди.
“Ғалабам маълум бўлган ўша кечада мен икки кишига қўнғироқ қиламан: Путин ва Зеленскийга. Уларга “учрашишимиз керак” деб айтаман. Мен бу масалани ҳал қила олишимга кафолат бераман. Биз 24 соат ичида келишув тузамиз”, — деди Трамп.
Собиқ президент, агар у ҳозир АҚШ етакчиси бўлганида, Россия уруш бошламаган бўларди, деган фикрини такрорлади. У, шунингдек, Украинага ёрдам учун сарф-харажатларни тўхтатишга, бунинг ўрнига тезроқ келишувга эришишга чақирди: “Миллиардлаб, юзлаб миллиард долларларни совуриш мумкин эмас”. Трампнинг фикрича, АҚШнинг ёрдами можарони узайтирмоқда.
АҚШда навбатдаги президентлик сайловлари 2024 йилга мўлжалланган бўлиб, анъанавий тарзда ноябрь ойида ўтказилади, инаугурация эса 2025 йилнинг январь ойида бўлиб ўтади.
Трамп аллақачон президентликка номзодини эълон қилган. У аввал ҳам Украинадаги уруш ҳақида бир неча бор гапирган, амалдаги президенти Жо Байденнинг ҳаракатларини танқид қилган ва унга қарши баёнотлар берган.
Изоҳ (0)