Ukrainadagi urushning natijasi noma’lum, ammo hozirda Rossiya rahbari Vladimir Putin o‘z ambitsiyalarini o‘zgartirgani borasida hech qanday alomat yo‘q. Bu haqda NATO bosh kotibi Yens Stoltenberg ma’lum qildi.
“Biz buning aksini ko‘rmoqdamiz. U tinchlikni xohlamaydi. U yangi urushni rejalashtirmoqda”, — deya ta’kidladi NATO yetakchisi.
U Rossiya allaqachon yangi hujum amaliyotlarini boshlaganini aytib, Baxmut hududidagi harbiy to‘qnashuvlarga ishora qildi.
“Bu yirik bahorgi hujummi yoki shunchaki uning muqaddimasimi, aytish qiyin. Lekin ular tobora ko‘proq qo‘shin va ko‘proq qurol-yarog‘larni tortib kelmoqda”, — dedi NATO bosh kotibi.
Stoltenbergning qo‘shimcha qilishicha, Rossiya harbiy xizmatchilar sonini oshirish bilan qoniqarsiz jihozlar va yomon logistika ta’minotini xaspo‘shlashga harakat qilmoqda.
Alyans vakili buni “mudofaa chizig‘iga odamlar to‘lqinini tashlash” deb atadi. U, shuningdek, bunday janglar Birinchi jahon urushidan beri kuzatilmaganini ta’kidladi.
Uning so‘zlariga ko‘ra, Ukrainaning g‘alabasi uchun Kiyevga harbiy yordam ko‘rsatishni davom ettirish kerak.
Avvalroq Stoltenberg Ukrainaning NATOdagi istiqbolini tasdiqlagan edi. Shu bilan birga, u Ukrainaning urushdagi g‘alabasi mamlakatni integratsiyalash va Yevroatlantika hamjamiyatiga to‘liq qo‘shishning yagona yo‘li ekanini aytgan.
Izoh (0)