АҚШда 18 ёшли йигит мактабда отишма содир этди. Ҳодиса оқибатида 14 нафар бола ва ўқитувчи, шунингдек, гумонланувчининг ўзи ҳалок бўлди
Техас штати Ювалда шаҳрида жойлашган бошлағич мактабда содир этилган отишма оқибатида камида 14 нафар ўқувчи ва бир нафар ўқитувчи ҳалок бўлди, дея маълум қилган Техас губернатори Грэйг Эббот. Унинг сўзларига кўра, 18 ёшли юқори синф ўқувчиси бўлган гумонланувчи ҳам ҳалок бўлган. Йигитни ҳодиса жойига етиб келган полициячилар отиб ўлдиргани тахмин қилинмоқда. Губернатор баёнотидан аввал маҳаллий полиция отишма содир этган гумонланувчининг қўлга олинганини хабар қилганди.
Яна 15 нафар ўқувчи Ювалдадаги шифохонага ётқизилган. Отишма вақтида яраланган 45 ёшли эркакка ҳам тиббий ёрдам кўрсатилмоқда. Сан-Антониода отишма оқибатида талафот етган икки нафар жабрланувчи касалхонага олиб келинган. Шунингдек, бу ерда университет шифохонасига 10 ёшли қизча ва 66 ёшли аёл олиб келингани баён этилган. Хабарда айтилишича иккала жабрланувчи ҳам оғир аҳволда. Бундан ташқари отишмада икки нафар полиция зобити яраланган.
Мактабда одамларга ўқ узишидан аввал гумонланувчи ўз бувисини отиб ташлаган, дейилади Эбботт баёнотида. Аёлнинг аҳволи ҳақида маълумотлар берилмаган. Гумонланувчининг Салвадор Ромас исмли йигит эканлиги аниқланган. Маҳаллий ҳукумат унинг ўз автомобилини ташлаб, мактаб биносига тўппонча ёки милтиқ билан киргани хусусида ахборот берган. Тергов эса мерганнинг ёлғиз ҳаракатланиб, одамларни ўққа тутганини билдирган. Гумонланувчининг мазкур ҳаракатларига нима сабаб бўлгани ҳозирча номаълум.
Эбботт содир бўлган воқеани «даҳшатли йўқотиш» ва «маънисиз жиноят» дея таърифлаган. Губернатор маҳаллий ҳукуматнинг бу борада тезкор чоралар кўраётганини айтган. Тергов ишида полициядан ташқари рейнжерлар ва жамоат хавфсизлиги департаменти вакиллари иштирок этмоқда. Осиёдаги ишчи ташрифдан қайтаётган АҚШ президенти Жо Байден содир бўлган ҳодисадан хабар топган. У Оқ уйга қайтганидан кейин мазкур ҳодиса юзасидан нутқ сўзлайди.
Ювалдадаги отишма 18 ёшли талабанинг Нью-Йорк штатида жойлашган Буффало шаҳридаги супермаркетда 10 кишини отиб ташлаганидан 10 кун ўтиб содир бўлди. Супермаркетда йигит отган одамларнинг деярли ҳаммаси қоратанлилар бўлган. Полиция қоратанлиларга нисбатан нафрат оқибатида содир этилган мазкур жиноят юзасидан тергов олиб бормоқда.
