Туркиядаги зилзила вақтида деразадан учиб кетган телефон бир оиланинг ҳаётини сақлаб қолди

Anadolu агентлиги Туркиядаги даҳшатли зилзиладан омон қолган оилалардан бири вайроналар остидан қандай тасодиф билан қутқариб олингани ҳақида ёзди.

Маълум қилинишича, Туркия шарқидаги Малатя вилоятида яшайдиган бу оила уяли телефон шарофати билан қутқарилган. Ниёзий Мисри кварталида зилзила содир бўлган вақтда зарба кучидан уй деразаси олдида турган телефон ташқарига учиб кетган. Кейинчалик вайроналар ёнида юрган чет элликнинг кўзи телефонга тушади, ўша пайтда оиланинг қариндошлари қўнғироқ қилаётган эди. Хорижлик гўшакни олиб бино қулагани ҳақида хабар берган, бунинг натижасида улар тезда воқеа жойига етиб келишган ва яқинларини чиқариб олишган.

Оила бошлиғи Илҳами Экин, зилзиладан сўнг рафиқаси Сонгул, қизлари Туба ва Суна, ўғли Муҳаммад билан вайроналар остида қолганини айтди. Зилзила вақтида эркакнинг уяли телефони дераза токчасида турган ва туртки кучи таъсирида кўчага отилган.

Илҳами Экиннинг сўзларига кўра, вайроналар остида оила умидсизликка тушган, бироқ бахтли тасодиф уларнинг ҳаётини сақлаб қолган.

“Учинчи қаватда яшардик. 18 ёшли ўғлим вафот этди. У ҳарбий бўлишни орзу қиларди. Худо ҳеч кимни бундай қайғуга солмасин. Вайроналар остида қолган барчага Аллоҳ таоло ёрдам берсин”, — дейди у.

Малатялик эркак рафиқаси ва қизлари билан вайроналар остидан энг биринчилардан бўлиб қутқарилган.

“Ҳаммамиз жароҳат олдик. Қизим ва хотиним касалхонага ётқизилди, иккинчи қизим ва мен ҳалигача муолажа оляпмиз. Чап оёғимда синишлар бор. Операция қилишди, ҳозир ўзимни яхши ҳис қиляпман”, — дейди у.