АҚШнинг Оклахома штати Талса шаҳрида Майкл Льюис исмли эркак шаҳар тиббий маркази биносига бостириб кириб, аввалроқ ўзини операция қилган жарроҳни отиб ташлади, деб хабар беради «Коммерсантъ». Ўлимидан олдин ёзиб қолдирган хатида Майкл Льюис шифокорни ўзидаги оғриқлар туфайли ўлдирганини маълум қилган.
Бемор АР-15 ярим автоматик винтовка (сойли милтиқ) ва тўппончадан фойдаланган. Ўзини даволаган шифокордан ташқари, у яна бир тиббиёт ходимини ва икки беморни ҳам ўлдирган, деб хабар қилади Reuters.
CNN телеканали маълумотларига кўра, яна тахминан ўн киши яраланган. Полиция ҳужум қилган шахс ўзини отиб ташлаганини тахмин қилмоқда.
Таъкидланишича, бу АҚШда сўнгги бир ҳафта ичида юз берган тўртинчи отишмадир. Улардан бири 1 июнь куни Оклахоманинг Талса шаҳридаги бошқа бир касалхонада содир этилганди. Оқибатда тўрт киши, шу жумладан ўқотарнинг ўзи ҳам ҳалок бўлган.
30 май кунги отишма ҳам шу штатда, Тафт шаҳридаги фестивалда юз бериб, бир кишининг ўлими, етти кишининг яраланиши билан тугаган. 24 май куни отишма билан боғлиқ воқеа Техаснинг Ювалд шаҳрида бўлиб ўтди: 19 нафар ўқувчи ва 3 нафар катта ёшлилар ҳалок бўлди. Шундан кейин АҚШ президенти Жо Байден қурол лоббисига қарши курашишга чақирди.
3 июнь куни президент америкаликларга мурожаатида конгрессни мамлакатда ўқотар қуроллар айланмаси устидан назоратни кучайтиришга чақирди. Хусусан, у оддий фуқароларга ҳужум қуролларини ва кўп сонли патронлар учун ўқдонларни сотишни тақиқлашни таклиф қилди. Агар бу тақиқнинг иложи бўлмаса, қурол сотиб олиш мумкин бўлган ёшни 18 дан 21 гача ошириш керак, деди АҚШ раҳбари.
Изоҳ (0)