Россиянинг Украинага қарши урушини бошлаган Владимир Путинни украиналиклар ҳам, бошқа давлатлар ҳам кечирмайди. Бу ҳақда Украина президенти Владимир Зеленский Германиянинг Spiegel нашрига берган интервьюсида маълум қилди.
“Украиналиклар Путинни кечирмайди. Дунёнинг аксарият давлатлари эса Россиянинг амалдаги раҳбариятини анчадан бери ҳисобдан чиқаришган. Бу менга Гитлернинг интиҳосини эслатади: у жаҳон урушида ютқазганида ҳам Лондонни бомбардимон қилишда давом этган. У аҳмоқ одам бўлмаса ҳам шундай қилганди”, — деди Зеленский.
Зеленский Украина ва Россия ўртасида сиёсий ва тарихий жиҳатдан катта бўшлиқ борлигини таъкидлади.
“Бу дунёқараш масаласи. Путиннинг дунёқараши натижаси эса: вайрон қилинган ҳудудлар, халқаро ҳуқуқ, инсон ҳуқуқлари, барча тирик мавжудотларга эътибор бермаслик”, — дея таъкидлади Украина раҳбари.
Зеленскийнинг фикрича, Россиянинг амалдаги президентини тўхтатиб бўлмайди, “чунки Путин оч аждаҳо: унинг иштаҳасини қондириш учун сиз унга бирин-кетин мамлакатларни ёки ҳеч бўлмаганда уларнинг бир қисмини тортиқ қилишингиз керак”.
Шунингдек, у Россияга қарши санкциялар жорий этишга ёки Украинга қурол-яроғ етказиб беришга шошилмаётган айрим давлатларнинг сиёсатидан ҳафсаласи пир бўлганини айтди.
“Руслар сизнинг чегарангизда пайдо бўлгач, ўз халқингиз ҳаётини қурбон қилишга мажбур бўласиз. Шунинг учун Украина бугун қилаётган иш сизнинг мамлакатингиз учун ҳам фойдали”, — деди Зеленский.
Изоҳ (0)