Credit Suisse банки 2022 йилда глобал молиявий инқироздан бери рекорд даражада зарар кўрди

9 февраль куни Швейцариянинг Credit Suisse банки ўзининг тўртинчи чораги ва 2022 йил якунлари бўйича молиявий ҳисоботларини тақдим этди.

Credit Suisse 2022 йилни 7,3 миллиард франк (7,9 миллиард доллар) зарар билан якунлади, бу 2021 йилдагидан бир неча баробар кўпдир. 

Мазкур кўрсаткич глобал молиявий инқироз содир бўлган 2008 йилдан бери энг катта йиллик йўқотишдир. 

Банкнинг йил давомидаги даромади 34 фоизга камайиб, 14,9 миллиард франкни (16,2 миллиард доллар) ташкил этди. Тўртинчи чоракдаги даромад эса 33 фоизга камайиб, 3,1 миллиард франк (3,4 миллиард доллар) бўлди. 

Чораклик соф зарар 2021 йилнинг шу даврига нисбатан 1,4 миллиард франкни (1,5 миллиард доллар) ташкил этди. Натижалар таҳлилчилар кутганидан ҳам ёмонроқ бўлди.

Банкнинг ўзи 2023 йилнинг охиригача зарар кўриб, 2024 йилдан фойда олишни кутмоқда. Молиявий ҳисобот эълон қилингандан кейин Credit Suisse акциялари 3,6 фоизга арзонлашди. 

Аввалроқ Credit Suisse инвестицион банки тарихдаги энг оғир даврни бошдан кечираётгани, алоҳида компанияга айланиш учун инвесторларни қидираётгани ҳақида хабар берилган эди.