ОТБ Ўзбекистонда иқтисодий бошқарувни яхшилаш учун 150 млн доллар ажратади

Осиё тараққиёт банки (ОТБ) Ўзбекистонда иқтисодий бошқарувни яхшилаш учун 150 млн доллар миқдорида қарз ва 400 минг доллар миқдорида грант ажратилишини маъқуллади. Бу ҳақда банк матбуот хизмати хабар бермоқда. 

ОТБнинг Иқтисодий бошқарувни яхшилаш дастурининг 2-фазаси биринчи кичик дастури давлат сектори бошқаруви ислоҳотларидаги ОТБнинг олдинги кўмагини давом эттиради ва чуқурлаштиради. 

Дастур доирасида Ўзбекистонга молиявий бошқарувнинг самарадорлиги ва шаффофлигини ошириш, давлат корхоналари бошқаруви ва фаолиятини такомиллаштиришда кўмак берилмоқда. 

Шу жумладан, рақобатни рағбатлантириш ва ишончли коррупцияга қарши кураш ва аудит тизимлари ёрдамида давлат сектори ҳисобдорлигини ошириш мақсадида ҳуқуқий, тартибга солиш ва институционал базани ислоҳ қилишда ҳам ёрдам берилмоқда.

“Ўзбекистон янада очиқ ва рақобатбардош бозор иқтисодиётига ўтишга ёрдам берадиган ислоҳотларга қатъий содиқлигини намойиш этди, — дейди ОТБнинг Марказий ва Ғарбий Осиё бўйича бош директори Евгений Жуков. 

Унинг таъкидлашича, ОТБ мамлакатга макроиқтисодий барқарорликни, инклюзив ва барқарор ўсишни таъминлаган ҳолда ушбу мақсадга эришишда ёрдам беришда давом этади.

Бундан ташқари, дастур Ўзбекистоннинг “яшил” иқтисодиётга ўтиш стратегиясини ишлаб чиқиш ва амалга оширишни қўллаб-қувватлайди. 

Аниқ миллий режа Ўзбекистонга Париж келишуви бўйича ўз мажбуриятларини бажаришга, инфратузилмани модернизация қилишга ва ишчи кучини “яшил” иш ўринлари учун зарур бўлган кўникмаларга ўргатишга ёрдам беради.

“Давлат сектори инвестициялари учун фискал майдон яратиш, давлат хизматларини кўрсатиш сифатини ошириш ва Ўзбекистонда хусусий секторни ривожлантириш учун қулай муҳит яратиш учун давлат корхоналарининг молиявий шаффофлигини ошириш, корпоратив ва профессионал бошқарувини такомиллаштириш ва монополияга қарши кураш тизимларини мустаҳкамлаш муҳим аҳамият касб этади”, — деди ОТБнинг Давлат бошқаруви бўйича бош иқтисодчиси Чидем Акин.

400 минг доллар миқдоридаги техник кўмак гранти ислоҳотларни амалга оширишга ёрдам беради.

Ўзбекистон ОТБга 1995 йилда аъзо бўлган. Ўшандан бери ОТБ мамлакатга 10,8 млрд доллар миқдорида қарз, грант ва техник кўмак тақдим этган.

ОТБ 1966 йилда ташкил этилган бўлиб, унга 68 мамлакат аъзо бўлган. Уларнинг 49 таси минтақада жойлашган.