Ўзбекистондаги банклар томонидан 2022 йил давомида 203 трлн сўм миқдорида ёки ўтган йилга нисбатан 22 фоиз ортиқ кредитлар ажратилган. Бу ҳақда Марказий банк шарҳидан маълум бўлди.
-7.jpg)
Ажратилган кредитларнинг 68 фоизи (137,8 трлн сўм) корпоратив ва 32 фоизи (65,3 трлн сўм) аҳолига ажратилган кредитлар ҳиссасига тўғри келади.
Компанияларга берилган кредитларнинг 37 фоизи (ёки 51 трлн сўми) айланма маблағларни тўлдириш учун ажратилган револвер кредитлардир.
Шунингдек, ажратилган кредитларнинг 31 фоизи қисқа муддатли ва 69 фоизи узоқ муддатли, валюталар қирқимида эса 65 фоиз кредитлар миллий валютада ва 35 фоиз хорижий валютадаги кредитлар ҳиссасига тўғри келади.
Мазкур даврда банклар томонидан 136 трлн сўмлик кредитлар сўндирилган бўлиб, кредитни қайтариш даражаси 67 фоизни ташкил этган.
Банкларнинг жами кредит қўйилмалари қолдиғи 2023 йил 1 январь ҳолатига кўра 390 трлн сўмни ташкил этиб, уларнинг 74 фоизи корпоратив кредитлар, 26 фоизи чакана кредитлар ҳиссасига тўғри келади.
Жами кредит портфели қолдиғи ўтган йилнинг мос даврига нисбатан 20 фоизга ёки 63,7 трлн сўмга, хусусан, корпоратив кредитлар 13 фоизга (32,2 трлн сўм) ва аҳоли кредитлари 45 фоизга (31,5 трлн сўм) ўсган.
Аҳолига ажратилган кредитлар таркибида автокредитлар 10,9 трлн сўмга (2021 йилга нисбатан 2 баробарга), ипотека кредитлари 10,6 трлн сўм (30 фоизга) ва микроқарзлар 6,2 трлн сўмга (1,7 баробарга) ўсган.
Банк тизимида муаммоли кредитлар (NPL) улуши 2023 йил 1 январь ҳолатига 3,6 фоизни (14 трлн сўм) ташкил этиб, ўтган йилнинг мос даврига нисбатан 1,6 фоиз бандга пасайган.
Бунда, корпоратив кредитларнинг NPL қисми 2022 йилда 1,3 фоиз бандга пасайиб, 3,5 фоизни, чакана кредитларда эса 3 фоиз бандга пасайиб, 3,8 фоизни ташкил этган.
Изоҳ (0)