2022 йилда Ўзбекистонга хориждан пул ўтказмалари ҳажми 2,1 баробарга ошиб, 16,9 млрд долларни ташкил этди. Бу ҳақда Марказий банк раиси Мамаризо Нурмуратов маълум қилди.
Унинг сўзларига кўра, ўтказмаларнинг 85 фоизи ёки қарийб 14,5 млрд доллари Россия ҳиссасига тўғри келади. Бу 2021 йилга нисбатан 2,6 баробар кўпдир.
Маълумотларга кўра, бу фарқ 2022 йил давомида Қирғизистон ва Тожикистонда маълум миқдорда нақд валюта тақчиллиги юзага келгани, шу сабабли банкларда айрим чекловлар жорий этилгани билан боғлиқ. Бундай шароитда мазкур давлат фуқаролари Ўзбекистонга валюта ўтказиб, мамлакат банклари орқали нақд пул олиб чиққан.
Пул ўтказмалари оқимининг ортиши фонида валюта операциялари кўрсаткичлари ҳам ошди. Таклиф ҳажми талабдан 2,9 млрд долларга ошиб, 2,5 миллиард долларни ташкил этди.
Январь—декабрь ойларида банклар томонидан аҳолидан 11,9 млрд долларлик валюта харид қилинди, бу 2021 йилга нисбатан 4,8 млрд доллар ёки 1,7 баробар кўпдир.
Шу билан бирга, аҳоли 8,9 млрд долларга валюта сотиб олди, бу 4,3 млрд доллар ёки ўтган йилга нисбатан деярли икки баробар кўпдир.
Ўзбекистондан бошқа давлатларга ўтказилган пул ўтказмалари ҳажми 29 фоизга ошиб, 2,1 миллиард долларни ташкил этди. Ўзбекистонликлар асосан Туркия, Хитой, АҚШ ҳамда Ҳиндистон каби мамлакатларга пул ўтказмаларини амалга оширган. Регулятор раисининг қайд этишича, бу мамлакатлар қаторида деярли ўзгариш йўқ.
2022 йил 3-чорак якунларига кўра, Россиядан Ўзбекистонга пул оқими икки баробарга кўпайгани маълум қилинганди. Шу даврда Ўзбекистонда пул ўтказмалари 2022 йилнинг 9 ойида 2,2 баробарга ошиб, 12,6 млрд долларни ташкил қилган.
2022 йилнинг дастлабки 6 ойида Ўзбекистонга 6,54 млрд долларлик пул ўтказмалари келиб тушган эди. Ўша пайтда ҳам ўсиш кўрсаткичи 2,2 баробар бўлган.
Изоҳ (0)