Ўзбекистон валюта биржасида 2022 йилги савдолар ҳажми 700 трлн сўмлик рекорд даражани қайд этди
Ўзбекистон Республика валюта биржасида (ЎзРВБ) савдоларнинг умумий ҳажми 2022 йилда рекорд даража — 706,79 трлн сўмга етди. Бу ҳақда АОКАда ўтказилган брифингда Валюта биржаси ахборот хизмати раҳбари Гулшан Ботирова маълум қилди.
Биржада савдолар ўтган йилга нисбатан 81,6 фоизга ўсган.
ЎзРВБ томонидан валюта, пул, давлат қимматли қоғозлари бозорларида ва 2022 йилдан бошлаб деривативлар бозорида биржа савдолари ташкил этилган.
Биржа савдоларининг хизмат турлари давлат қимматли қоғозларини ҳисобга олиш ва уларни сақлаш бўйича депозитар хизматларни кўрсатиш ҳамда ҳисоб-китоб ва клирингни амалга ошириш каби функцияларни ҳам қамраб олган.
Валюта бозори ҳақида
ЎзРВБ валюта бозорида АҚШ доллари, евро, Россия рубли ва Хитой юани олди-сотдиси бўйича спот операциялари ЎзРВБ томонидан ишлаб чиқилган “Рҳомбус” платформасида "колл-аукцион" ҳамда икки томонлама аукцион усуллари орқали амалга оширилади.
2022 йил якунлари бўйича биржа валюта бозоридаги савдоларнинг умумий ҳажми 338,34 трлн сўмни ташкил этиб, ўтган йилнинг мос кўрсаткичига нисбатан 1,5 баробар ошди.
Пул бозори тўғрисида
Банклараро пул бозорида бугунги кунда ЎзРВБнинг махсус электрон платформаси орқали банкларнинг бўш пул маблағларини 1 кундан бир йилгача бўлган муддатга жалб қилиш ва жойлаштириш бўйича савдолар ўтказилиб, Марказий банкнинг банклар билан депозит аукционлари ҳам ташкил этилган.
Ушбу бозорда ўтказиладиган савдолар бозор қатнашчиларига қисқа муддатли активларга пул маблағларини тезкор равишда жалб қилиш ва жойлаштириш учун қўшимча имконият яратади.
Сўнгги йиллардаги ҳажмлар ижобий динамикаси пул бозори инструментлари жозибадорлиги тўғрисида далолат беради.
2022 йилда ушбу бозордаги савдоларнинг умумий ҳажми рекорд даража — 270,61 трлн сўмни ташкил этиб, ўтган йилги кўрсаткичга нисбатан деярли 93 фоизга ошди.
Давлат қимматли қоғозлари бозори
Ушбу бозорда ЎзРВБнинг электрон савдо-депозитар платформаси орқали Ўзбекистон Молия вазирлигининг ғазначилик мажбуриятлари ва облигациялари, шунингдек Марказий банкнинг облигациялари бирламчи жойлаштирилиши ва иккиламчи муомаласи бўйича савдолар, шунингдек РЕПО операциялари ташкил этилган.
2022 йилда ушбу бозорда жами 87,29 трлн сўм қийматида давлат қимматли қоғозлари жойлаштирилган бўлиб, 2021 йилга нисбатан ушбу кўрсаткич 3,5 баробар ошди.
