Неча ёшда бўлишдан қатъий назар, юрак хасталикларининг олдини олиш учун ҳеч қачон эрта ва кеч эмас. Қуйидаги 7 та илм-фан томонидан исботланган оддий одатлар хавфни сезиларли даражада камайтиришга ёрдам беради.
Статистик рақамлар даҳшатли: ҳар икки кишидан бири ҳаёти давомида инсульт ёки инфаркт касаллигига дучор бўлади. Аммо яхши хабар шуки, парҳез ёки турмуш тарзидаги кичик ўзгаришлар ҳам хасталик хавфини камайтиради ва муваффақиятли натижага эриштиради.
Шўр таомларни камроқ енг
Қанча кўп туз истеъмол қилинса, организмда қон миқдори ортади, бу эса юракка қўшимча юк. Агар бу мунтазам равишда такрорланадиган бўлса, бизнинг энг муҳим органимиз ҳаддан ташқари кўп ишлайди ва хасталанади.
Уйқу меъёрда бўлсин
Кундалик 7-8 соатлик уйқу биз учун жуда муҳимдир, акс ҳолда, организм гипертония билан жавоб қайтаради. Эпидемиология журналида чоп этилган тадқиқотга кўра, 24 ёшдан 32 ёш оралиқдаги инсонларнинг 30 фоизи аллақачон юқори қон босимини бошдан кечирган. Ҳеч қандай чора кўрилмаса, бу юрак етишмовчилигининг ривожланишига олиб келиши мумкин.
Жисмоний машқ қилинг
Вазифангиз юрак уриш тезлигини мунтазам равишда ошириб боришдир. Тез юриш, югуриш, сузиш ва бошқа аэробика ҳаракатлари юрак мушакларимизни таранглаштиради (масалан, югуриш пайтида юрак оёқ мушакларига қараганда икки баравар фаол ишлайди), машқ қилдиради ва кучайтиради. Шу тариқа ҳафтада камида 150 дақиқа жисмоний фаоллик зарур минималдир.
Ўзингизни бўш қўйинг
Доимий стресс, хавотир ва ташвишлар юрак касалликларининг ажралмас ҳамроҳларидир. Кортизол стресс гормони қон босими ва юрак уриши тезлигини оширади, бу организм учун ҳалокатли комбинация бўлиши ҳеч гап эмас. Бундан ташқари, кортизол артерияларнинг шиллиқ қаватига зарар етказиши билан қоннинг тана аъзоларига озуқа моддаларини етказиб беришини қийинлаштиради. Шу боис дам олишни ва стрессдан халос бўлишни ўрганиш ниҳоятда зарур.
Тишларни ўз вақтида парвариш қилинг
Оғиз бўшлиғида кўпаядиган бактериялар нафақат тиш, милклар саломатлиги учун хавфлидир: улар қон томир деворларига зарар етказиши, янада мўртлашишига олиб келиши мумкин. Кунига икки марта тишларни ювинг, ип билан тозаланг ва йилига икки марта тиш шифокори кўригидан ўтинг.
Тухум истеъмол қилинг
Heart журналида чоп этилган тадқиқот муаллифлари инсультнинг олдини олиш учун қила оладиган энг оддий нарса — бу кунига битта тухум истеъмол қилиш эканлигини қайд этган.
Олимлар 9 йил давомида ярим миллион кишининг саломатлик ҳолатини таҳлил қилиб, кунига камида битта товуқ тухумини истеъмол қилганларда юрак хасталиклари хавфи 11 фоизга, инсульт хавфи эса 26 фоизга камайганини аниқлашди. Тадқиқотга кўра, тухумда юракни ҳимоя қиладиган соғлом ҲДЛ холестерин даражасини ошириш хусусияти мавжуд, шунингдек, таркибидаги моддалар зарарли холестеринни организмдан чиқариб юборади. Бундан ташқари, тухум оқсилга бой маҳсулот бўлиб, қонда шакар даражасини пасайтиришга ва ўртача вазнни сақлашга ёрдам беради, ҳам инсульт хавфини камайтиради.
...ва ёғли балиқ
Ҳафтада уч ёки ундан кўп порция ёғли балиқ истеъмол қилсангиз, инсульт хавфи 6-12 фоизга камаяди. Бу Stroke журналида чоп этилган Швеция тадқиқотининг натижалари. 400 000 кўнгилли иштирок этган тадқиқот муаллифларининг фикрича, гап балиқларда кўп бўлган омега-3 ёғ кислоталари ҳақида кетмоқда. Ушбу кислоталар томирлардаги яллиғланишни камайтиради, қон айланишини яхшилайди ва тромблар ҳосил бўлиш эҳтимолини камайтиради.
Мавзуга доир:
Изоҳ (0)