Европа Кенгаши раҳбари Шарл Мишель Украина президенти Владимир Зеленскийни 9—10 февраль кунлари Брюсселда бўлиб ўтадиган Европа Иттифоқи етакчилари саммитида шахсан иштирок этишга таклиф қилди. Бу ҳақда Мишелнинг вакили Баренд Лейст Twitter’да маълум қилди.
“Хавфсизлик нуқтаи назаридан, бошқа маълумотлар берилмайди”, — деди Лейст.
6 февраль куни Британиянинг Financial Times газетаси манбаларга таяниб, ЕИ раҳбарияти Зеленскийнинг шу ҳафта Брюсселдаги саммитига келишига тайёргарлик кўраётгани ҳақида хабар берганди. Бельгиянинг Белга агентлиги манбалари Украина раҳбари 9 февралда келишини айтди. Европарламентнинг навбатдан ташқари сессиясида Украина президенти шахсан сўзга чиқиши кутилмоқда. Зеленский вакиллари бу ҳақда изоҳ бермади.
Financial Times Украина президентининг Брюсселга ташрифи хавфсизлик нуқтаи назаридан бекор қилиниши мумкинлигини ҳам таъкидлади, буни Зеленскийнинг ўзи ўтган ҳафта журналистлар билан суҳбатда тан олган.
Агар Зеленский Брюсселга келса, бу унинг Россиянинг Украинага кенг миқёсли босқинидан кейин Украинадан ташқарига иккинчи сафари бўлади. Уруш бошланганидан бери унинг ягона хорижий ташрифи 2022 йил декабрь ойида Вашингтонга бўлганди. Ўшанда Зеленский АҚШ президенти Жо Байден билан учрашган ва Конгресснинг қўшма йиғилишида нутқ сўзлаган.
Изоҳ (0)