Туркиядаги фалокатли зилзила қурбонлари сони 2 921 нафарга етди. Бу ҳақда Milliyet газетаси Фавқулодда вазиятлар бошқармаси (AFAD) маълумотларига таяниб хабар берди. Яна 15 834 киши жабрланган. Дунёнинг 65 давлати Анқарага ёрдам таклиф қилди.
Сурия Соғлиқни сақлаш вазирлиги ҳам мамлакатда зилзиладан жабр кўрганлар ҳақида маълумот берди. Унга кўра, Сурияда 764 киши ҳалок бўлган, 1 448 киши жароҳатланган. Шу билан бирга, Al Arabiya телеканали Сурияда 1,4 мингдан ортиқ қурбонлар ҳақида ёзмоқда.
Европа Ўрта Ер денгизи сейсмология маркази маълумотларига кўра, 7 февраль куни, Тошкент вақти билан 08:13 да Туркиянинг марказий қисмида 5,3 магнитудали янги зилзила содир бўлган. Зилзила эпитцентри Анқарадан 43 км, Бесни шаҳридан 13 км узоқликда жойлашган. Зилзила ўчоғи 10 км чуқурликда.
Туркия фавқулодда вазиятлар бошқармаси ҳам 5,3 магнитудали зилзила ҳақида хабар берди. Уга кўра, зилзила эпимарказига энг яқин шаҳар Адияман вилоятининг Гелбоши шаҳри бўлиб, силкинишлар ўчоғи 8,13 км чуқурликда жойлашган. Ушбу зилзиладан беш дақиқа олдин Малатя вилоятининг Дўғаншеҳир шаҳри яқинида 5,0 магнитудали яна бир зилзила қайд этилган.
Эслатиб ўтамиз, 6 февраль тонгида Туркиянинг Газиантеп шаҳри яқинида 7,5 магнитудали кучли зилзила содир бўлди. Ер силкинишлари яна бир қанча вилоятларда, шунингдек, Сурия ва Ливанда ҳам сезилган. Шу куни Туркия ва яна 6 давлатда қатор зилзилалар қайд этилди.
Изоҳ (0)