Yevropa Kengashi rahbari Sharl Mishel Ukraina prezidenti Vladimir Zelenskiyni 9—10-fevral kunlari Bryusselda bo‘lib o‘tadigan Yevropa Ittifoqi yetakchilari sammitida shaxsan ishtirok etishga taklif qildi. Bu haqda Mishelning vakili Barend Leyts Twitter’da ma’lum qildi.
“Xavfsizlik nuqtayi nazaridan, boshqa ma’lumotlar berilmaydi”, — dedi Leyst.
6-fevral kuni Britaniyaning Financial Times gazetasi manbalarga tayanib, YI rahbariyati Zelenskiyning shu hafta Bryusseldagi sammitiga kelishiga tayyorgarlik ko‘rayotgani haqida xabar bergandi. Belgiyaning Belga agentligi manbalari Ukraina rahbari 9-fevralda kelishini aytdi. Yevroparlamentning navbatdan tashqari sessiyasida Ukraina prezidenti shaxsan so‘zga chiqishi kutilmoqda. Zelenskiy vakillari bu haqda izoh bermadi.
Financial Times Ukraina prezidentining Bryusselga tashrifi xavfsizlik nuqtai nazaridan bekor qilinishi mumkinligini ham taʼkidladi, buni Zelenskiyning oʻzi oʻtgan hafta jurnalistlar bilan suhbatda tan olgan.
Agar Zelenskiy Bryusselga kelsa, bu uning Rossiyaning Ukrainaga keng miqyosli bosqinidan keyin Ukrainadan tashqariga ikkinchi safari bo‘ladi. Urush boshlanganidan beri uning yagona xorijiy tashrifi 2022-yil dekabr oyida Vashingtonga bo‘lgandi. O‘shanda Zelenskiy AQSH prezidenti Jo Bayden bilan uchrashgan va Kongressning qo‘shma yig‘ilishida nutq so‘zlagan.
Izoh (0)