Айни вақтда президент Шавкат Мирзиёев Янги Андижон туманида вилоят фаоллари ва масъуллар иштирокида видеоселектор йиғилишини ўтказмоқда. Бу ҳақда “Дарё” мухбири хабар берди.
Давлат раҳбари кун тартибидаги иккинчи масала — камбағалликни қисқартириш ва аҳоли бандлигини таъминлаш масаласига тўхталди.
Таъкидланишича, ўтган ҳафта бўлган йиғилишда 2023 йилда 5 миллион нафар аҳоли бандлигини таъминлаш, хусусан 2 миллион доимий иш ўринларини яратиш бўйича ҳудудлар ва тармоқ раҳбарларига аниқ вазифалар қўйилган.
“Бугун ушбу ишларни қандай ташкил этиш бўйича Андижоннинг туман ва шаҳар ҳокимлари, бандлик ва камбағалликка масъул ўринбосарлари, сектор раҳбарларининг режаларини бирма-бир эшитаман. Вилоятда 127 минг нафар ишсиз фуқаро мавжуд. (ишсизлик даражаси – 8,9 фоиз). Ҳар йили яна 50 минг нафар ёшлар меҳнат бозорига кириб келади”, — деди давлат раҳбари.
Шавкат Мирзиёев ишсизлар сонига алоҳида тўхталиб ўтди. Таъкидланишича, ишсизлик Андижон шаҳри (18 минг), Шаҳрихон (12 минг), Асака (14 минг), Андижон ва Избоскан (10 мингдан) туманларида юқори.
“Шунингдек, “Темир дафтар”га 13,5 минг нафар аҳоли, “Аёллар дафтари”га 63 минг нафар хотин-қизлар ва “Ёшлар дафтари”га 1,5 минг нафар ёшлар киритилган. Бизнес учун яратилган шарт-шароитлар ва имкониятлар бўйича Бўстон ва Улуғнор 5-тоифага, Жалақудуқ, Марҳамат, Избоскан ва Пахтаобод 4-тоифага тўғри келади. Аҳолини камбағалликдан чиқариш, бандликни таъминлаш бўйича вилоятга етарли шароитлар қилиб бердик. Мисол учун, куни кеча имзоланган қарорга кўра, оилавий тадбиркорлик учун имтиёзли кредитларга бу йили 1,1 триллион сўм ажратилади (ўтган йили 800 миллиард сўм). Сўнгги икки йилда аҳолига деҳқончилик учун 8 минг гектар ҳосилдор экин ерлари берилган, 2023 йилда яна 10 минг гектар ер тарқатилади. Маҳаллаларда саноатни ривожлантириш учун, 36 та микромарказ ташкил этилади. Лекин, вилоятдаги туман ва шаҳар ҳокимлари, сектор раҳбарлари булардан қанчалик фойдаланаяпти?”, — деди президент.
Изоҳ (0)