Айни вақтда президент Шавкат Мирзиёев Янги Андижон туманида вилоят фаоллари ва масъуллар иштирокида видеоселектор йиғилишини ўтказмоқда. Бу ҳақда “Дарё” мухбири хабар берди.
Президент ижтимоий соҳа объектларида “қуёш энергияси”дан фойдаланиш учун алоҳида компания ташкил этилишини айтди. Унга 200 миллион доллар маблағ берилади.
“6 та йирик банк устав фондига 50 миллион доллар ва айланма маблағига 150 миллион доллар ажратади. Компания қуёш панеллари ва сув иситиш қурилмаларини ўзи ўрнатади ва “яшил энергия”ни бюджет корхонасига сотади. Шунингдек, бу соҳа даромадлилигини тадбиркорларга тушунтириб, уларни жалб қилиш керак. Кичик қуёш панелидан олинадиган 1 киловатт-соат электр энергия таннархи ўртача 450 сўм, бюджет ташкилотига 800 сўмга сотиш мумкин”, — деди давлат раҳбари.
Шавкат Мирзиёев йирик корхоналарда ҳам қайта тикланувчи энергия манбалари ўрнатилишини айтди.
“Андижонлик тадбиркорлар ҳар доим энг илғор ташаббуслар билан чиқиб, бошқа ҳудудларга ўрнак бўлади. Бу сафар ҳам, кўплаб йирик тадбиркорлар, маҳаллалар ўз биноларида қуёш энергиясини ўрнатишни бошлагани, катта-катта марралар олаётганидан хабарим бор. Биз бундай фидойиларни албатта қўллаб-қувватлаймиз”, — деди президент.
Давлат раҳбари водийдаги йирик корхоналар ўзининг электр эҳтиёжини 100 фоиз ўзи таъминлашга ўтказиш, вилоят ҳокимлари, Энергетика вазирлиги ва тармоқ раҳбарлари учун устувор вазифа бўлиши кераклигини таъкидлади.
Президентнинг айтишича, Савдо-саноат палатаси барча йирик ва ўрта корхоналар билан бирга ишлаб, уларга манфаатли шароит яратиб, Андижон тажрибасини республикада оммалаштиришга масъул бўлади.
“Шу билан бирга, водий тадбиркорлари 20, 30 ва 50 Мегаваттли кичик қуёш станциялари ва мини-ГЭСларни қуриш бўйича таклифлар билан чиқмоқдалар. Бу менга маъқул. Бу борада уларга барча шароитларни яратиб берамиз”, — дея қўшимча қилди давлат раҳбари.
Президент Инвестициялар, саноат ва савдо вазирлиги саноат корхоналарида қуёш панеллари ўрнатиш ва кичик станциялар қуриш учун халқаро молия ташкилотларидан 2 миллиард доллар жалб қилишини айтди.
“Эндиликда, аҳолига қуёш энергиясидан фойдаланиш учун жозибадор тизим яратамиз. Водийдан бошлаб, хонадонларда ишлаб чиқарилган ва тармоққа узатилган ҳар бир киловатт соат учун 1 минг сўмдан ҳисоб-китоб қилинади (ҳозир 295 сўм)”, — деди президент.
Изоҳ (0)