Ayni vaqtda prezident Shavkat Mirziyoyev Yangi Andijon tumanida viloyat faollari va masʼullar ishtirokida videoselektor yigʻilishini oʻtkazmoqda. Bu haqda “Daryo” muxbiri xabar berdi.
Davlat rahbari kun tartibidagi ikkinchi masala — kambagʻallikni qisqartirish va aholi bandligini taʼminlash masalasiga toʻxtaldi.
Taʼkidlanishicha, oʻtgan hafta boʻlgan yigʻilishda 2023-yilda 5 million nafar aholi bandligini taʼminlash, xususan 2 million doimiy ish oʻrinlarini yaratish boʻyicha hududlar va tarmoq rahbarlariga aniq vazifalar qoʻyilgan.
“Bugun ushbu ishlarni qanday tashkil etish boʻyicha Andijonning tuman va shahar hokimlari, bandlik va kambagʻallikka masʼul oʻrinbosarlari, sektor rahbarlarining rejalarini birma-bir eshitaman. Viloyatda 127 ming nafar ishsiz fuqaro mavjud. (ishsizlik darajasi – 8,9 foiz). Har yili yana 50 ming nafar yoshlar mehnat bozoriga kirib keladi”, — dedi davlat rahbari.
Shavkat Mirziyoyev ishsizlar soniga alohida toʻxtalib oʻtdi. Taʼkidlanishicha, ishsizlik Andijon shahri (18 ming), Shahrixon (12 ming), Asaka (14 ming), Andijon va Izboskan (10 mingdan) tumanlarida yuqori.
“Shuningdek, “Temir daftar”ga 13,5 ming nafar aholi, “Ayollar daftari”ga 63 ming nafar xotin-qizlar va “Yoshlar daftari”ga 1,5 ming nafar yoshlar kiritilgan. Biznes uchun yaratilgan shart-sharoitlar va imkoniyatlar boʻyicha Boʻston va Ulugʻnor 5-toifaga, Jalaquduq, Marhamat, Izboskan va Paxtaobod 4-toifaga toʻgʻri keladi. Aholini kambagʻallikdan chiqarish, bandlikni taʼminlash boʻyicha viloyatga yetarli sharoitlar qilib berdik. Misol uchun, kuni kecha imzolangan qarorga koʻra, oilaviy tadbirkorlik uchun imtiyozli kreditlarga bu yili 1,1 trillion soʻm ajratiladi (oʻtgan yili 800 milliard soʻm). Soʻnggi ikki yilda aholiga dehqonchilik uchun 8 ming gektar hosildor ekin yerlari berilgan, 2023-yilda yana 10 ming gektar yer tarqatiladi. Mahallalarda sanoatni rivojlantirish uchun, 36 ta mikromarkaz tashkil etiladi. Lekin, viloyatdagi tuman va shahar hokimlari, sektor rahbarlari bulardan qanchalik foydalanayapti?”, — dedi prezident.
Izoh (0)