Германия канцлери Олаф Шольц Украинага жанговар самолётлар етказиб беришга муносабати ўзгармаганини таъкидлаб, бунинг сабабини тушунтирди. Бу ҳақда Tagesspiegel хабар берди.
Шольцнинг сўзларига кўра, Украинага Ғарб қирувчи самолётларини етказиб бериш масаласи ҳали ҳам кўтарилмаган.
“Агар Германияда Украинага Леопард 2 танкларини етказиб бериш қарори қабул қилингандан сўнг дарҳол яна бир мунозара бошланса, бу жиддий кўринмайди ва фуқароларнинг ҳукумат қарорига бўлган ишончига путур етказади”, — деб таъкидлади канцлер.
Сиёсатчи Россиянинг Украинага қарши уруши Россия ва НАТО ўртасидаги урушга айланиб кетмаслиги учун қўлидан келган ҳамма нарсани қилишини айтди. У Россия президенти Владимир Путин билан телефон орқали мулоқотни давом эттириш ниятидалигини билдирди.
“Мен 11 ой ичида Путин билан Франция президенти Эммануэл Макрон каби қайта-қайта гаплашдим. Охирги мулоқот декабрь ойи бошида бўлган. Путин билан яна суҳбатлашаман, чунки бу муҳим”, — деди Шольц.
Украина президенти Владимир Зеленский Ғарб ҳамкорларини Украинага F-16 самолётларини имкон қадар тезроқ етказиб беришга чақирди. Нидерландия F-16 қирувчи самолётларини Украинага топшириш масаласини кўриб чиқишга тайёрлигини билдирди. Бироқ бунинг учун Киев уларга сўров юбориши кераклиги маълум қилинди.
Байден маъмурияти иттифоқчилар билан Украинага қирувчи самолётлар етказиб бериш масаласини муҳокама қилишини таъкидлади.
Изоҳ (0)